കോച്ചിനെ പുറത്താക്കി ഗോകുലം; സഹപരിശീലകൻ ടി.എ.രഞ്ജിത്തിന് ചുമതല

കോഴിക്കോട് ∙ ഐ ലീഗിലെ മോശം പ്രകടനം തുടരുന്നതിനിടെ ഗോകുലം കേരള എഫ്സി മുഖ്യപരിശീലകനെ പുറത്താക്കി. സ്പാനിഷ് പരിശീലകനായ അന്റോണിയോ റുവേദയെയാണ് ക്ലബ് പുറത്താക്കിയത്. ഇന്നു ഡൽഹി എഫ്സിക്കെതിരായ മത്സരത്തിൽ സഹപരിശീലകൻ ടി.എ.രഞ്ജിത്തിനാണ് ടീമിന്റെ ചുമതല. ഐ ലീഗ് സീസണിലെ 14 കളികളിൽ അഞ്ചെണ്ണത്തിൽ മാത്രമാണ് ഗോകുലം വിജയിച്ചത്. മുൻപ് രണ്ടു തവണ ലീഗ് ജേതാക്കളായിട്ടുള്ള ടീം നിലവിൽ 7–ാം സ്ഥാനത്താണ്.  ചർച്ചിൽ ബ്രദേഴ്സിന്റെ മുൻ പരിശീലകനായ അന്റോണിയോ റുവേദ ഈ സീസണിനു മുന്നോടിയായി കഴിഞ്ഞ ഏപ്രിലിലാണ് ഗോകുലത്തിലെത്തിയത്.