കൂനൂരിൽ മാർക്കറ്റിൽ വൻ തീപിടിത്തം; 12 കടകൾ കത്തിനശിച്ചു

ഗൂഡല്ലൂർ ∙ കൂനൂരിലെ മാർക്കറ്റിൽ പുലർച്ചെ ഉണ്ടായ വൻ തീ പിടിത്തത്തിൽ 12 കടകൾ കത്തി നശിച്ചു. ഇന്നലെ പുലർച്ചെ ഒരു മണിയോടെയാണ് മാർക്കറ്റിൽ തീ പടർന്നത്. ഫയർഫോഴ്സ് 7 മണിക്കൂർ ശ്രമിച്ചാണു തീ നിയന്ത്രിച്ചത്. തീ പടർന്ന ഉടൻ വൈദ്യുതിയും നിലച്ചതോടെ ഫയർഫോഴ്സ് വാഹനങ്ങളിൽ വെള്ളം നിറയ്ക്കാൻ കഴിയാതെ വന്നതായും പരാതി ഉയരുന്നുണ്ട്.

പിന്നീട് ഊട്ടി, കോത്തഗിരി, അറവൻകാട് ഭാഗത്ത് നിന്നും ഫയർഫോഴ്സ് വാഹനങ്ങളെത്തി തീ നിയന്ത്രിച്ചത്. മാർക്കറ്റിലെ പെയ്ന്റ് കടകളിൽ തീ പടർന്നതോടെ തീ നിയന്ത്രണാതീതമായി. കൂനൂർ നഗരസഭയുടെ കീഴിലുള്ള മാർക്കറ്റിൽ 800 കടകളാണ് ഉള്ളത്. കോടിക്കണക്കിനു രൂപയുടെ നഷ്ടം സംഭവിച്ചിട്ടുണ്ട്. കൂനൂർ പൊലീസ് കേസെടുത്ത് അന്വേഷണം തുടങ്ങി.