മെയ് വഴക്കത്തോടെ റിമ: ആരാധക ഹൃദയങ്ങൾ കീഴടക്കി യമുന

റിമ കല്ലിങ്കൽ ചുവടുവച്ച ‘യമുന’ എന്ന സംഗീത ആൽബം ആരാധകഹൃദയങ്ങൾ കീഴടക്കുന്നു. സംഗീതസംവിധായകൻ ശ്രീവത്സൻ ജെ.മേനോൻ ആണ് ഗാനം ചിട്ടപ്പെടുത്തി ആലപിച്ചത്. ആലാപനത്തിലെയും ആവിഷ്കാരത്തിലെയും വ്യത്യസ്തതയും മനോഹാരിതയും കൊണ്ട് പാട്ട് ഏറെ ശ്രദ്ധിക്കപ്പെട്ടിരിക്കുകയാണ്. 

അസാമാന്യമായ മെയ് വഴക്കത്തോടെയും ഭാവാഭിനയത്തോടെയുമാണ് റിമ കല്ലിങ്കലിന്റെ പ്രകടനം. രണ്ടു വ്യത്യസ്തമായ ദൃശ്യാനുഭവമാണ് ‘യമുന’ ആസ്വാദകർക്കു സമ്മാനിക്കുന്നത്. ചടുലവും താളം മുറിയാതെയുമുള്ള പ്രകടനം വിഡിയോയെ ഏറെ മികച്ചതാക്കി. റിമ കല്ലിങ്കലും സന്തോഷ് മാധവും ചേർന്നാണ് നൃത്തസംവിധാനം നിർവഹിച്ചത്. 

അദ്വൈത ദാസ് ആണ് പാട്ടിനു വരികളൊരുക്കിയത്. അജയൻ ചാലിശ്ശേരി കലാസംവിധാനം നിർവഹിച്ച വിഡിയോയുടെ എഡിറ്റിങ് അജയ് കുയിലൂർ ആണ്. ബിനു പണിക്കർ ആണ് പാട്ടിന്റെ നിർമാണം. ആസ്വാദകർക്കു നവ്യാനുഭവം പകർന്ന ‘യമുന’യ്ക്ക് മികച്ച പ്രതികരണങ്ങളാണ് സമൂഹമാധ്യമങ്ങളിൽ നിന്നും ലഭിക്കുന്നത്.