അദാനി സ്റ്റിക്കറുമായി കോൺഗ്രസ് ധർണ

ന്യൂഡൽഹി ∙ ‘അദാനിയും മോദിയും ഒന്നാണ്, അദാനി സേഫ് ആണ്’ എന്നെഴുതിയ സ്റ്റിക്കറുകൾ പതിച്ച ജാക്കറ്റുകൾ അണിഞ്ഞാണ് കോൺഗ്രസ് അംഗങ്ങൾ ഇന്നലെ പാർലമെന്റിലെത്തിയത്. ഗൗതം അദാനിയും നരേന്ദ്ര മോദിയും ഒരുമിച്ച് വിമാനത്തിലിരിക്കുന്ന പഴയചിത്രവും സ്റ്റിക്കറിൽ ഉൾപ്പെടുത്തിയിരുന്നു. സമാജ്‍വാദി പാർട്ടി, തൃണമൂൽ കോൺഗ്രസ് ഒഴികെയുള്ള ഇന്ത്യാസഖ്യം പാർട്ടികളും പ്രതിഷേധത്തിൽ ഒപ്പമുണ്ടായിരുന്നു.  

ഇന്നലെ രാവിലെ പാർലമെന്റ് വളപ്പിൽ കോൺഗ്രസ് എംപിമാരുടെ യോഗത്തിനു ശേഷമാണ് ജാക്കറ്റുകളും അണിഞ്ഞ് പ്രിയങ്ക ഗാന്ധിയുടെ നേതൃത്വത്തിൽ അംഗങ്ങൾ ധർണ നടത്തിയത്. അദാനി വിഷയത്തിലുള്ള ഇന്ത്യാസഖ്യത്തിന്റെ പ്രതിഷേധങ്ങളിൽനിന്ന് വിട്ടുനിൽക്കുന്നെങ്കിലും ചോദ്യോത്തരവേളയിൽ അദാനി പ്രശ്നം തൃണമൂൽ കോൺഗ്രസും ചർച്ചയാക്കി. തൃണമൂൽ എംപി സൗഗത റായിയാണ് തിരുവനന്തപുരം അടക്കമുള്ള വിമാനത്താവളങ്ങളുടെ നടത്തിപ്പ് അദാനിയെ ഏൽപ്പിച്ച വിഷയം ഉയർത്തിയത്.