മൂന്നാറിൽ മാത്രമല്ല കൊതിപ്പിക്കുന്ന തണുപ്പ്; യാത്രപോയാലോ ഈ 'ചില്ലിങ്' കുളിരിടങ്ങളിലേക്ക്

തണുപ്പുകാലമിങ്ങെത്തി. ഒപ്പം അവധിക്കാലവും. തണുപ്പിൽ മൂടിപ്പുതച്ച് മനം നിറയെ മഞ്ഞു നിറച്ചൊരു യാത്ര ആരും കൊതിക്കും. ആരെയും ആകർഷിക്കുന്ന തരത്തിൽ മൂന്നാറിൽ മഞ്ഞുകാലമെത്തിക്കഴിഞ്ഞു. മഞ്ഞ് പെയ്യുന്നതിനൊപ്പം മൂന്നാറിൽ സഞ്ചാരികളും പെയ്തിറങ്ങിത്തുടങ്ങി. സഞ്ചാരികളുടെ വരവ് കൂടിയതോടെ മൂന്നാർ തണുപ്പിലും തിരക്കിലും വീർപ്പുമുട്ടുകയാണ്. തിരക്കേറുമ്പോൾ തണുപ്പിന്റെ സുഖം കുറയുന്നതു പോലെയും തോന്നാം. തിരക്കു കൂടിയാൽ പിന്നെ തണുപ്പിനെന്തു സുഖം. എന്നാൽ മൂന്നാറിൽ മാത്രമല്ല തണുപ്പുള്ള സ്ഥലങ്ങൾ. തെക്കു വടക്കു കിടക്കുന്ന വിനോദ സഞ്ചാര കേന്ദ്രങ്ങളിൽ പലയിടത്തും മഞ്ഞുണ്ട്. മഞ്ഞു കാലവും. അടുത്ത കാലത്തായി ഇവിടങ്ങളിലേക്കും സഞ്ചാരികൾ വന്നു തുടങ്ങിയിട്ടുണ്ട്. അതോടെ ഇവിടെയെല്ലാം വിനോദ സഞ്ചാരികൾക്കുള്ള സൗകര്യങ്ങളും ചൂടു പിടിച്ചു തുടങ്ങി. പല സ്ഥലങ്ങളും നിങ്ങളുടെ കൈയെത്തും ദൂരത്താണ്. തിരക്കും കുറവ്, നിരക്കും കുറവ്. കുളിരിന് ഒരു കുറവുമില്ല. ഈ മഞ്ഞു കാലത്ത്, ഈ മഞ്ഞുകൂടാരങ്ങളിലേക്ക് ഒരു വെക്കേഷൻ യാത്ര പോയാലോ...