ആദായ നികുതി ബില്ലിൽ പുതിയതായി എന്തൊക്കെ ഉണ്ട് ? പഴയ വീഞ്ഞ് പുതിയ കുപ്പിയിലോ?

പാർലമെന്റ് ബജറ്റ് സമ്മേളനത്തിൽ ഇന്ന് ഉച്ചയ്ക്ക് ആദായനികുതി ബിൽ ലോക്സഭയിൽ അവതരിപ്പിച്ചു. 2026 ഏപ്രിൽ 1 മുതൽ പ്രാബല്യത്തിൽ വരുന്ന 'നികുതി വർഷം' എന്ന പുതിയ ആശയം ഇതിന്റെ പ്രത്യേകതയാണ്. പുതിയ ആദായനികുതി ബില്ലിൽ ഇതുവരെ വലിയ ഘടനാപരമായ മാറ്റങ്ങളൊന്നും ഉൾപ്പെടുത്തിയിട്ടില്ലെങ്കിലും, ഭാഷ ലളിതമാക്കിയിട്ടുണ്ട്.

ധനമന്ത്രി പറഞ്ഞതു പോലെ സംശയമുള്ള  പല ഭാഗങ്ങളും  നീക്കം ചെയ്തിട്ടുണ്ട്. പുതിയ ബില്ലിൽ 23 അധ്യായങ്ങളും 536 വിഭാഗങ്ങളും 16 ഷെഡ്യൂളുകളും ഉൾപ്പെടുന്നു. 298 ആയിരുന്ന വിഭാഗങ്ങളുടെ എണ്ണത്തിൽ വർദ്ധനവ് ഉണ്ടെങ്കിലും, അധിക വ്യവസ്ഥകൾ നീക്കം ചെയ്തതും ലളിതമാക്കിയ ഭാഷയും കാരണം ബിൽ ഇപ്പോഴും ചെറുതാണ്.

ബില്ലിലെ പ്രധാന നിർദ്ദേശങ്ങൾ

∙പുതിയ നിയമനിർമ്മാണത്തിൽ പഴയ നികുതി വ്യവസ്ഥ തുടരും, എന്നാൽ നികുതിദായകർക്ക് പുതിയ നികുതി വ്യവസ്ഥ സ്ഥിരമായി സ്വീകരിക്കാം (ഡീഫോൾട് ).

∙പുതിയ ബിൽ 'അസസ്‌മെന്റ് വർഷം' എന്ന പദം ഒഴിവാക്കി, പകരം 'നികുതി വർഷം' എന്ന് ചേർത്തു.

∙മൂലധന നേട്ട കണക്കുകൂട്ടലിനുള്ള പ്രത്യേക വ്യവസ്ഥകൾ ഉൾപ്പെടുന്നു.

∙ഒന്നിലധികം വിഭാഗങ്ങളിൽ ലിസ്റ്റുചെയ്യുന്നതിനുപകരം, ഒരു വിഭാഗത്തിൽ ശമ്പള കിഴിവുകൾ ഏകീകരിക്കുന്നു.

∙പുതിയതോ അധികമോ ആയ നികുതികൾ ഏർപ്പെടുത്തിയിട്ടില്ല.

∙ബിസിനസിനുള്ള 44AD പരിധി 2 കോടിയിൽ നിന്ന് 3 കോടിയായി ഉയർത്തി.

∙പ്രൊഫഷണലുകൾക്ക് പരിധി 50 ലക്ഷത്തിൽ നിന്ന് 75 ലക്ഷമായി ഉയർത്തി.

പാർലമെന്റിൽ ബിൽ പാസായിക്കഴിഞ്ഞാൽ, അത് പുനഃപരിശോധനയ്ക്കായി പാർലമെന്ററി ധനകാര്യ സ്റ്റാൻഡിങ് കമ്മിറ്റിക്ക് അയയ്ക്കും.

ആമുഖ ഘട്ടത്തിൽ പ്രതിപക്ഷ അംഗങ്ങൾ ബില്ലിനെ എതിർത്തെങ്കിലും സഭ ശബ്ദവോട്ടിലൂടെ ബില്ല് അവതരിപ്പിക്കുന്നതിനുള്ള പ്രമേയം പാസാക്കി.

1961ലെ ആദായനികുതി നിയമത്തിനു പകരം വരുന്ന ബില്ലിൽ കാര്യമായ മാറ്റങ്ങളില്ലെന്ന് സാമ്പത്തിക വിദഗ്ധർ പറയുന്നു. പഴയ വീഞ്ഞ് പുതിയ കുപ്പിയിൽ എന്ന് പറയും പോലെ നിയമത്തിൽ പലയിടങ്ങളിലായി പറഞ്ഞിരുന്ന കാര്യങ്ങൾ ഒരുമിച്ച് ആക്കിയെന്നതാണ് പ്രധാന കാര്യം. മറ്റൊന്ന്   വെളിപ്പെടുത്താത്ത സ്വത്ത് സംബന്ധിച്ച പരിശോധനയിൽ ആഭരണങ്ങൾ, പണം, ബുള്ള്യൻ തുടങ്ങിയവയ്ക്കൊപ്പം ക്രിപ്റ്റോകറൻസി പോലെയുള്ള വെർച്വൽ ഡിജിറ്റൽ ആസ്തികളും ഉൾപ്പെടുത്തിയിട്ടുണ്ട്.

ഒപ്പം ഓൺലൈൻ നടപടികൾക്ക് പ്രാമുഖ്യം നൽകുന്ന 'മുഖരഹിത' (faceless) ഇടപാടുകൾക്ക് മുുൻഗണന ഉണ്ട്.

ഡിഡക‍്ഷനുകൾ, ഗ്രാറ്റുവിറ്റി, ലീവ് എൻകാഷ്‍മെന്റ് തുടങ്ങിയ ശമ്പളം സംബന്ധിച്ച വ്യവസ്ഥകൾ പലയിടത്തായി ചിതറിക്കിടന്നത് പട്ടികരൂപത്തിൽ ഒരുമിപ്പിച്ചിട്ടുണ്ട്.

നികുതിദായകരുടെ അവകാശങ്ങളും കടമകളും വിവരിക്കുന്ന ടാക്സ്പെയേഴ്സ് ചാർട്ടർ ബില്ലിൽ ഉൾപ്പെടുത്തിയിട്ടുണ്ട്.

വ്യക്തിഗത നികുതി ദായകർക്ക് കുറച്ച് എളുപ്പമാകുമെന്നതൊഴിച്ചാൽ കാര്യങ്ങൾ അത്ര ലളിതമാകില്ലെന്നാണ് വിദഗ്ധരുടെ ആദ്യഘട്ട അഭിപ്രായം.