പെട്ടെന്ന് ‍പ്രമേഹം ബാധിച്ചു; യുഎസിലെ മേഘപ്പുലി ‘കോഷി’ വിടപറഞ്ഞു

യുഎസിലെ യൂട്ടായിൽ സ്ഥിതി ചെയ്യുന്ന ലിവിങ് പ്ലാനറ്റ് അക്വേറിയത്തിലെ പ്രശസ്തനായ മേഘപ്പുലി ‘കോഷി’ പെട്ടെന്നു ബാധിക്കപ്പെട്ട പ്രമേഹത്താൽ ചത്തു. പത്തുവയസ്സായിരുന്നു കോഷിക്ക്. മൃഗശാലയിലെത്തുന്നവരുടെ പ്രധാന ആകർഷണ ജീവിയായിരുന്നു കോഷി. 2016ൽ ആണ് കോഷിയെയും റൂ എന്ന മറ്റൊരു മേഘപ്പുലിയെയും ഹൂസ്റ്റൺ മൃഗശാലയിൽ നിന്നു ലിവിങ് പ്ലാനറ്റിലെത്തിച്ചത്. റൂ ഇന്നുമുണ്ട്. അക്വേറിയം എന്നാണു പേരെങ്കിലും ജലജീവികൾ മാത്രമല്ല ലിവിങ് പ്ലാനറ്റിൽ. 550 സ്പീഷീസുകളിലായി 4500 മൃഗങ്ങൾ ഇവിടെയുണ്ടെന്നാണു കണക്ക്.

നിയോഫിലിസ് നെബുലോസ എന്നു ശാസ്ത്രനാമമുള്ള മേഘപ്പുലികൾ പൊതുവെ താഴ്ന്ന മേഖലകളിൽ അധിവസിക്കാൻ ഇഷ്ടപ്പെടുന്നവരാണ്. നാഗാലാൻഡിലെ താനാമീർ ഗ്രാമത്തിൽ ഇവയെ കണ്ടെത്തിയത് ഇടയ്ക്കു വലിയ വാർത്തയായിരുന്നു. താനാമീർ ഗ്രാമത്തിൽ താമസിക്കുന്ന തദ്ദേശീയ ഗോത്രവംശമായ യിംഖ്യൂങ്ങുകളുടെ ഭാഷയായ ചിറിൽ ‘ഖെഫാക്’ എന്ന പേരിലാണു മേഘപ്പുലികൾ അറിയപ്പെടുന്നത്.

പുലികളുടെ കൂട്ടത്തിൽ തന്നെ വലുപ്പം കുറഞ്ഞ  മൃഗങ്ങളാണു മേഘപ്പുലികൾ. ഒരു മീറ്റർ വരെ നീളമുള്ള ഇവയുടെ ഭാരം 11 മുതൽ 20 കിലോ വരെയാണ്. സാധാരണ പുലികളിൽ നിന്നു വ്യത്യസ്തമായി വിചിത്രമായ ഘടനയുള്ള പുറം രൂപമാണ് മേഘപ്പുലികളുടെ പ്രത്യേകത. മേഘരൂപത്തിലുള്ള ഈ ഘടനകൾ മൂലമാണ് ഇവയ്ക്ക് ക്ലൗഡഡ് ലെപ്പേഡ്സ് അഥവാ മേഘപ്പുലികൾ എന്ന പേരു ലഭിച്ചതും. ഇളംമഞ്ഞ മുതൽ കടുത്ത ബ്രൗൺ വരെ നിറത്തിലുള്ള ഈ ജീവികളെ കണ്ടുകിട്ടിയിട്ടുണ്ട്. വളരെ നീളം കൂടിയ വാലും പല്ലുകളും ഇവയ്ക്കുണ്ട്. ചെറിയ കാലുകളും വീതിയേറിയ പാദങ്ങളുമുള്ള ഇവ കാട്ടിലൂടെ അതിദ്രുതം ചലിക്കാനും മരം കയറാനും അതി വിദഗ്ധരാണ്.

ഹിമാലയത്തിന്റെ താഴ്വരകളുമായി ബന്ധപ്പെട്ടും തെക്കുകിഴക്കൻ ഏഷ്യയിലുമായാണ് ഇവയുടെ അധിവാസ മേഖല. ഇന്ത്യ കൂടാതെ തെക്കൻ ചൈന, ഭൂട്ടാൻ, നേപ്പാൾ, മ്യാൻമർ, തായ്‌ലൻഡ്, വിയറ്റ്നാം, മലേഷ്യ, കംബോഡിയ, ലാവോസ്, ബംഗ്ലദേശ് എന്നിവിടങ്ങളിൽ ഇവ കാണപ്പെടുന്നു. തായ്‌വൻ ദ്വീപിൽ മുൻപ് ഇവയുടെ സാന്നിധ്യമുണ്ടായിരുന്നെങ്കിലും ഇന്ന് ഇവയ്ക്ക് അവിടെ പൂർണ വംശനാശം സംഭവിച്ചുകഴിഞ്ഞു. വംശനാശ ഭീഷണി നേരിടുന്ന ജീവികളായിട്ടാണ് ഐക്യരാഷ്ട്ര സംഘടന ഇവയെ വിലയിരുത്തുന്നത്.