പുതുവത്സരം – സമദ് മടവൂർ എഴുതിയ കവിത

എരിഞ്ഞടങ്ങുവാനായിതാ ഡിസംബർ

കരിഞ്ഞ പ്രതീക്ഷതൻ സായന്തനത്തിൽ.

നിറമാർന്നൊരായിരം സ്വപ്നങ്ങളായിരുന്നില്ലേ

നടന്നുനീങ്ങുമീവത്സരം തന്നതും.

നിലാവിൻ തെളിമയാലേറെമോഹവും

നിറവേറ്റിത്തരാതെ നീ മടങ്ങീടുകയെന്നോ? 

കൈപ്പുറ്റൊട്ടേറെ ദിനരാത്രങ്ങളിൽ,

വിയർപ്പാറ്റിക്കരഞ്ഞേറെ പകലിലും.
 

നിലയ്ക്കാത്തനോവുകളായ് വന്ന് 

നിലയില്ലാക്കയത്തിൽ തള്ളിയും.

കുളിരുള്ള കാറ്റിലും വിങ്ങും

കൂരിരുൾ തിങ്ങുന്നു ഹൃത്തിൽ.

വരുമോയിനിയൊരു വത്സരം 

ഹർഷം വിതറിത്തലോടാൻ.

ജീവിതവിജയങ്ങൾ കൊയ്യാൻ

കൈപിടിച്ചീടുന്ന വർഷവും?
 

Content Summary: Malayalam Poem ' Puthuvalsaram ' written by Samad Madavoor