ബിടിഎസ് താരത്തെ ചുംബിച്ചു, 50കാരി വിവാദത്തിൽ; ലൈംഗികാതിക്രമമെന്ന് പരാതി
Mail This Article
കൊറിയൻ സംഗീത ബാൻഡ് ബിടിഎസിലെ താരത്തെ ചുംബിച്ച 50കാരി വിവാദത്തിൽ. പൊതുപരിപാടിക്കായി എത്തിയ ഗായകനെ അനുവാദം കൂടാതെ സ്ത്രീ കവിളിൽ ചുംബിക്കുകയായിരുന്നു. ഇവരെ ചോദ്യം ചെയ്യാനായി കൊറിയൻ പൊലീസ് വിളിപ്പിച്ചെന്നാണു വിവരം. ജപ്പാൻകാരിയായ അവർ നിലവിൽ സ്വദേശത്താണുള്ളത്. വൈകാതെ ചോദ്യം ചെയ്യലിനു ഹാജരാകണം. പൊതുപരിപാടിക്കിടെ ലൈംഗികാതിക്രമം നടത്തിയതുമായി ബന്ധപ്പെട്ട വകുപ്പുകള്‍ സ്ത്രീക്കെതിരേ ചുമത്തിയിട്ടുണ്ടെന്നാണു വിവരം.
കഴിഞ്ഞ വര്‍ഷം സിയോളില്‍ നടന്ന ഫ്രീ ഹഗ് ഇവന്റിലായിരുന്നു സംഭവം. പരിപാടിക്കിടെ ബിടിഎസ് താരം ആയിരത്തോളം ആരാധകരെ ആലിംഗനം ചെയ്തു. നറുക്കെടുപ്പിലൂടെ തിരഞ്ഞെടുക്കപ്പെട്ടവരാണ് ഗായകന്റെ ആലിംഗനമേറ്റുവാങ്ങിയത്. ഇതിനിടെ 50കാരി താരത്തിന്റെ മുഖത്ത് ചുംബിക്കുകയായിരുന്നു. ആലിംഗനത്തിനു പകരം അനുവാദം കൂടാതെ ചുംബിച്ചതാണ് വിവാദത്തിനു വഴിവച്ചത്.
സംഭവത്തില്‍ ഒരു ബിടിഎസ് ആരാധകന്‍ പരാതി നല്‍കിയതോടെയാണ് പോലീസ് അന്വേഷണം ആരംഭിച്ചത്. കേസുമായി ബന്ധപ്പെട്ട കൂടുതല്‍ വിവരങ്ങള്‍ പോലീസ് പുറത്തുവിട്ടിട്ടില്ല. 18 മാസത്തെ നിര്‍ബന്ധിത സൈനികസേവനത്തിനു ശേഷമുള്ള ബിടിഎസ് താരത്തിന്റെ ആദ്യ പൊതുപരിപാടിയായിരുന്നു ഫ്രീ ഹഗ് ഇവന്റ്.
