സൈബർ സെക്യൂരിറ്റി രംഗത്ത് ആഗോള കമ്പനിയാകാൻ കേരളത്തിന്റെ വാല്യുമെന്റർ

കൊച്ചി ∙സൈബർ സുരക്ഷാ മേഖലയിൽ കേരളത്തിലെ ആദ്യ സ്റ്റാർട്ടപ്പുകളിലൊന്നായ വാല്യുമെന്റർ ഇൻഫോസെക് ഒരു ദശാബ്ദം പിന്നിട്ട വേളയിൽ ഒരുങ്ങുന്നതു കൂടുതൽ വികസനത്തിന്.

150 പുതിയ തൊഴിൽ അവസരങ്ങളാണ് ഉടൻ സൃഷ്ടിക്കുക. 2014ൽ ഇൻഫോപാർക്കിന്റെ കൊരട്ടി ക്യാംപസിലാണ് കമ്പനിയുടെ തുടക്കം. ‘‘ ഡേറ്റ ചോർച്ച, ഹാക്കിങ് സംഭവങ്ങൾ അനുദിനം വർധിക്കുന്നതിനാൽ സൈബർ സെക്യൂരിറ്റി അങ്ങേയറ്റം പ്രധാനം. പക്ഷേ, ഇന്ത്യയിൽ വെറും ഒരു ശതമാനത്തിൽ താഴെ സ്ഥാപനങ്ങൾ മാത്രമാണ് ഇക്കാര്യം ശ്രദ്ധിക്കുന്നത്’’–വാല്യുമെന്റർ സ്ഥാപകനും സിഇഒയുമായ ബിനോയ് കൂനമ്മാവ് പറയുന്നു.

സ്ഥാപനങ്ങളുടെ സമഗ്ര സൈബർ സുരക്ഷ ഉറപ്പാക്കുന്ന ഡിജിറ്റൽ ട്രസ്റ്റ് അഷ്വറൻസ് സർവീസസ് കമ്പനിയായ വാല്യുമെന്റർ 10 വർഷത്തിനകം ഈ രംഗത്ത് ആഗോളതലത്തിൽ ടോപ് 10 കമ്പനികളിലൊന്നായി മാറാനും ലക്ഷ്യമിടുന്നു.