‘അമുലി’നെ അമൂല്യ ബ്രാൻഡാക്കി സോധിയുടെ പടിയിറക്കം; രാജിവയ്ക്കാൻ നിർബന്ധിതനായി?

ന്യൂഡൽഹി ∙ ‘അമുൽ’ എന്ന ബ്രാൻഡ് നാമത്തിൽ അറിയപ്പെടുന്ന ഇന്ത്യയിലെ ഏറ്റവും വലിയ പാലുൽപന്ന വിതരണക്കാരായ ഗുജറാത്ത് കോ–ഓപ്പറേറ്റീവ് മിൽക്ക് മാർക്കറ്റിങ് ഫെഡറേഷൻ ലിമിറ്റഡിനെ (ജിസിഎംഎംഎഫ്) വളർച്ചയുടെ പടവുകളിലേക്കു കൈപിടിച്ചു കയറ്റിയ ശേഷമാണ് മാനേജിങ് ഡയറക്ടർ സ്ഥാനത്തുനിന്നു രൂപീന്ദർ സിങ് സോധി എന്ന ആർ.എസ്.സോധിയുടെ പടിയിറക്കം. 2010ൽ‌ എംഡി സ്ഥാനത്തെത്തിയ സോധി പടിയിറങ്ങുന്നതോടെ, അമുലിനെ സംബന്ധിച്ച് ഒരു കാലഘട്ടത്തിന്റെ അന്ത്യം കൂടിയാണിത്. ആർ.എസ്.സോധി എംഡി സ്ഥാനത്തെത്തുമ്പോഴുണ്ടായിരുന്ന വാർഷിക വിറ്റുവരവ് അഞ്ചിരട്ടിയിലേറെ വർധിപ്പിച്ചാണ് അദ്ദേഹം പദവിയൊഴിയുന്നത്.

1982 മാർച്ചിൽ സീനിയർ സെയിൽസ് ഓഫിസർ തസ്തികയിലാണു സോധി ജിസിഎംഎംഎഫിൽ ചേരുന്നത്. അന്ന് കമ്പനിയുടെ വിറ്റുവരവ് 121 കോടി രൂപ മാത്രം. സോധിയുടെ ശമ്പളം 1450 രൂപയും. 2000ൽ സോധി കമ്പനിയിലെ മാർക്കറ്റിങ് വിഭാഗം ജനറൽ മാനേജരായി. പത്തു വർഷങ്ങൾക്കുശേഷം 2010ൽ സോധിയെ കമ്പനിയുടെ എംഡിയായി നിയമിച്ചു.

ഇന്ത്യയിൽ ധവളവിപ്ലവത്തിന്റെ പിതാവായി അറിയപ്പെടുന്ന വർഗീസ് കുര്യന്റെ നേരിട്ടുള്ള മാർഗനിർദ്ദേശത്തിൽ മൂന്നു പതിറ്റാണ്ടിലധികം ജോലി ചെയ്യാൻ സാധിച്ചത് സോധിയെ വളരെയധികം സഹായിച്ചു. സോധി കമ്പനിയുടെ എംഡിയായി ചുമതലയേൽക്കുമ്പോൾ സെയിൽസിലെ വാർഷിക വിറ്റുവരവ് 9774 കോടി രൂപയായിരുന്നു. 2021–22 സീസണായപ്പോഴേയ്ക്കും ഇത് അഞ്ചിരട്ടിയോളം വളർന്ന് 46,481 കോടി രൂപയായി. അമുൽ ബ്രാൻഡിസുള്ള ഉൽപന്നങ്ങളുടെ മൊത്തം വിറ്റുവരവ് 2019–20 കാലഘട്ടത്തിൽ 52,000 കോടിയിലധികം രൂപയായിരുന്നുവെന്നും റിപ്പോർട്ടുകൾ വ്യക്തമാക്കുന്നു.

മാനേജിങ് ഡയറക്ടറെന്ന നിലയിൽ അമുൽ ബ്രാൻഡിൽ അൻപതിൽപ്പരം പുതിയ ഉൽപന്നങ്ങളാണ് അദ്ദേഹം വിപണിയിലെത്തിച്ചത്. ഒരു പതിറ്റാണ്ടു പിന്നിട്ട സേവനത്തിനുശേഷം എം‍ഡി സ്ഥാനത്തുനിന്ന് രാജിവയ്ക്കാൻ സോധി നിർബന്ധിതനായതാണെന്ന് റിപ്പോർട്ടുകളുണ്ടെങ്കിലും അമുലിന്റെ വളർച്ചയിൽ അദ്ദേഹത്തിന്റെ സംഭാവനകൾ വിസ്മരിക്കാവുന്നതല്ല. കഴിഞ്ഞ 3–4 വർഷമായി രാജിക്കാര്യം തന്റെ മനസ്സിലുണ്ടായിരുന്നുവെന്നാണു സോധിയുടെ ഭാഷ്യം.

English Summary: Amul MD RS Sodhi Resigns