ആധാറിന്‌ ഡിജിറ്റൽ തട്ടിപ്പുകൾ തടയാൻ സാധിക്കുമോ?

ഓൺലൈൻ തട്ടിപ്പുകൾ കൂടി വരുന്ന ഈ കാലത്ത് ആധാറിന്‌ ഇത് തടയാൻ സാധിക്കുമെന്ന് ഇൻഫോസിസ് സഹസ്ഥാപകനും നോൺ എക്സിക്യൂട്ടിവ് ചെയർമാനുമായ നന്ദൻ നിലേകനി. ഒരു ദേശീയ മാധ്യമത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. ആഗോളതലത്തിൽ പലതരം തട്ടിപ്പുകൾ റിപ്പോർട്ട് ചെയ്യുന്നുണ്ടെങ്കിലും, ഇന്ത്യയിൽ അതിന്റെ അളവ് കൂടുതലാണ്.

"ഡിജിറ്റൽ അറസ്റ്റ് എന്ന തട്ടിപ്പുള്ള ഒരേയൊരു രാജ്യം ഇന്ത്യയാണ്. മറ്റേതെങ്കിലും രാജ്യത്ത് ഡിജിറ്റൽ അറസ്റ്റ് പോലുള്ള തട്ടിപ്പ് നടക്കുന്നില്ല" നിലേകനി പറഞ്ഞു. "https://www.manoramaonline.com/business/personal-finance/2025/03/17/south-korea-bitcoin-reserves.html.

തട്ടിപ്പ് നടത്താൻ വിളിക്കുന്ന വ്യക്തിയുടെ ആധാർ ആധികാരികമാണോ എന്ന് പരിശോധിച്ചാൽ ഈ പ്രശ്‍നം പരിഹരിക്കാം എന്ന്  നിലേകനി പറഞ്ഞു. അത് പരിശോധിക്കാൻ ഓൺലൈൻ മാർഗങ്ങളുണ്ട് എന്ന് അദ്ദേഹം പറഞ്ഞു. എങ്ങനെ ആധാറിന് തട്ടിപ്പു തടയാൻ സാധിക്കും?

ബയോമെട്രിക് പ്രാമാണീകരണം

സ്ഥിരീകരണത്തിനായി വിരലടയാളം അല്ലെങ്കിൽ ഐറിസ് സ്കാൻ ആവശ്യപ്പെടുന്നതിലൂടെ മറ്റൊരാളുടെ ഐഡന്റിറ്റി വഞ്ചനാപരമായി ഉപയോഗിക്കുന്നത് തടയാം.

യുണീക്ക് ഐഡന്റിഫിക്കേഷൻ നമ്പർ

ഓരോ വ്യക്തിക്കും ഒരു പ്രത്യേക ആധാർ നമ്പർ ഉണ്ട്. അത് ഉപയോഗിച്ച് ആരാണ് വഞ്ചനാപരമായ പ്രവർത്തനങ്ങൾ നടത്തുന്നതെന്ന്  കണ്ടെത്താനാകും.

ഡിജിറ്റൽ പരിശോധന

ആധാർ തത്സമയ ഓൺലൈൻ പരിശോധന നടത്താൻ സാധിക്കും. ഇടപാടുകൾക്കിടയിൽ ഒരാളുടെ ഐഡന്റിറ്റിയുടെ ആധികാരികത പരിശോധിക്കുന്നത് എളുപ്പമാക്കുന്നു.

ലോക്കിങ് ബയോമെട്രിക്സ്

ഉപയോക്താക്കൾക്ക് അവരുടെ ആധാർ പോർട്ടലിൽ അവരുടെ ബയോമെട്രിക് ഡാറ്റ ലോക്ക് ചെയ്യാൻ കഴിയും, അതുവഴി അവരുടെ ആധാർ നമ്പർ അപഹരിക്കപ്പെട്ടാലും അനധികൃത ആക്‌സസ് തടയാനാകും.

ഇടപാടുകൾ നിരീക്ഷിക്കൽ

വ്യക്തികൾക്ക് അവരുടെ ആധാർ പ്രാമാണീകരണ ചരിത്രം നിരീക്ഷിച്ച് സംശയാസ്പദമായ എന്തെങ്കിലും പ്രവർത്തനം തിരിച്ചറിയാനും അത് യുഐഡിഎഐയിൽ റിപ്പോർട്ട് ചെയ്യാനും കഴിയും.

സംശയാസ്‌പദമായ പ്രവർത്തനം റിപ്പോർട്ട് ചെയ്യുക

നിങ്ങളുടെ ആധാറിൽ എന്തെങ്കിലും ദുരുപയോഗം നടന്നതായി സംശയം തോന്നിയാൽ, ഉടൻ തന്നെ വെബ്‌സൈറ്റ് അല്ലെങ്കിൽ ഹെൽപ്പ്‌ലൈൻ വഴി UIDAI-യെ അറിയിക്കുക.

അനാവശ്യമായി ആധാർ വിവരങ്ങൾ  മറ്റുള്ളവരുമായി പങ്കിടാതിരുന്നാൽ കുറേയേറെ തട്ടിപ്പുകൾ ഒഴിവാക്കാനാകും. ആധാർ നമ്പർ പങ്കിടുന്നതിന് പകരം, യുഐഡിഎഐ പോർട്ടൽ വഴി സൃഷ്ടിച്ച വെർച്വൽ ഐഡി ഉപയോഗിക്കുക എന്ന കാര്യവും പ്രധാനമാണ്.