ശ്രീനിവാസന് കേരള ഹിന്ദൂസ് ഓഫ് നോർത്ത് അമേരിക്ക ചലച്ചിത്ര പ്രതിഭാ പുരസ്കാരം

ന്യൂയോര്‍ക്ക് ∙ നടനും തിരക്കഥാകൃത്തും, സംവിധായകനുമായ ശ്രീനിവാസനെ കേരള ഹിന്ദൂസ് ഓഫ് നോർത്ത് അമേരിക്ക (കെ.എച്ച്.എൻ.എ.) ചലച്ചിത്ര പ്രതിഭാ പുരസ്കാരം നൽകി ആദരിക്കുന്നു. ഫെബ്രുവരി ഒന്നിന് കേരളത്തിൽ നടക്കുന്ന കെ.എച്ച്.എൻ.എ.യുടെ കേരള സംഗമ വേദിയിലായിരിക്കും പുരസ്കാരദാനം.

അന്നേ ദിവസം തന്നെ സുപ്രസിദ്ധ സാഹിത്യകാരിയും നിരൂപകയുമായപ്രഫ. ഡോ. എം ലീലാവതിക്ക് കെ.എച്ച്.എൻ.എ നാലാമത് ആർഷദർശന പുരസ്കാരം നൽകി ആദരിക്കും.  കെ.എച്ച്.എൻ.എ. രജത ജൂബിലി ആഘോഷങ്ങളുടെ ഭാഗമായി കെ.എച്ച്.എൻ.എ ഫോർ കേരള ( “KHNA for Kerala”) ജീവകാരുണ്യ പദ്ധതിക്കും ഇതോടെ തുടക്കമാകും. വിവിധ പദ്ധതികളിലായി ഒരു കോടി രൂപയുടെ ധനസഹായമാണ് കേരളത്തിനുവേണ്ടി ഡോ. ജയരാമൻ നേതൃത്വം നൽകുന്ന സേവാ ഫോറം നടപ്പിലാക്കുന്നത്.

പ്രഫഷനൽ വിദ്യാർഥികൾ, വിധവകൾ, ക്ഷേത്രകലാകാരന്മാർ തുടങ്ങിയവർക്ക് സഹായം, സ്ത്രീകൾക്ക് ബിസിനസ് വായ്പ, ശാരീരിക-മാനസിക വൈകല്യങ്ങൾ ഉള്ളവർക്ക് ചികിത്സാ സഹായം, ബാലാശ്രമങ്ങൾ, വിദ്യാലയങ്ങൾ, വൃദ്ധസദനങ്ങൾ മുതലായ സ്ഥാപനങ്ങൾക്ക് സഹായം, വനവാസി മേഖലയിൽ അടിസ്ഥാന സൗകര്യങ്ങൾ തുടങ്ങി നിരവധി കർമ്മപദ്ധതികളാണ് ഈ  സംരംഭത്തിൽ കെ.എച്ച്.എൻ.എ ഏറ്റെടുത്തിട്ടുള്ളത്.

കേന്ദ്ര മന്ത്രിമാർ,  ഗവർണർ, സംസ്ഥാന മന്ത്രിമാർ തുടങ്ങിയവർ പങ്കെടുക്കുന്ന പരിപാടി എറണാകുളത്തുള്ള അഡ്​ലക്‌സ് ഇന്‍റർനാഷനൽ കൺവൻഷൻ സെന്‍ററിൽ വച്ചാണ് നടക്കുക. സമൂഹത്തിലെ വിവിധ ശ്രേണികളിൽ നിന്നുള്ള പ്രമുഖർ പ്രത്യേക ക്ഷണിതാക്കളായി പരിപാടിയിൽ പങ്കെടുക്കുമെന്ന് കെ.എച്ച്.എൻ.എ. പ്രസിഡന്‍റ് അറിയിച്ചു.

2025 ഓഗസ്റ്റ് 17,18,19 തീയതികളിൽ ന്യൂജഴ്സിയിലെ അറ്റ്‌ലാന്‍റിക് സിറ്റിയിൽ വെച്ചു നടക്കുന്ന കെ.എച്ച്.എൻ.എ.യുടെ വിരാട് 25 എന്ന രജത ജൂബിലി കൺവെൻഷൻ വിജയിപ്പിക്കുന്നതിന് വിപുലമായ ഒരു കമ്മിറ്റി പ്രവർത്തിച്ചുവരുന്നു.
(വാർത്ത : ജയപ്രകാശ് നായർ)