നാടിന്റെ ആവശ്യങ്ങൾ മുന്നോട്ടുവച്ച് ജനപ്രതിനിധികൾ; എംഎൽഎ അറിയണം ഈ പ്രതീക്ഷകൾ

ചങ്ങനാശേരി ∙ നിയമസഭാ സാമാജികനായി ജോബ് മൈക്കിൾ ഇന്ന് സത്യപ്രതിജ്ഞ ചെയ്യുമ്പോൾ നാടിന്റെ പ്രതീക്ഷകളും ഏറെയാണ്. ഫലപ്രഖ്യാപനത്തിനും സത്യപ്രതിജ്ഞയ്ക്കും ഇടയിലുള്ള 3 ആഴ്ച മണ്ഡലത്തിന്റെ വിവിധ പ്രദേശങ്ങളിലെ പ്രശ്നങ്ങളിൽ ഇടപെട്ടും പരിഹാരം നിർദേശിച്ചും സജീവമായിരുന്നു ജോബ് മൈക്കിൾ. നിയോജകമണ്ഡലത്തിലെ തദ്ദേശ ഭരണ സ്ഥാപനങ്ങളിലെ അധ്യക്ഷന്മാർ, എംഎൽഎയുടെ ശ്രദ്ധ ക്ഷണിക്കുന്ന പ്രധാന ആവശ്യങ്ങൾ:

സന്ധ്യ മനോജ്(ചങ്ങനാശേരി നഗരസഭാധ്യക്ഷ )

∙ 24 മണിക്കൂറും നഗരപരിധിയിൽ ജലവിതരണം ഉറപ്പാക്കുന്ന രീതിയിൽ പ്രത്യേക ജലപദ്ധതി വേണം. പല കാരണങ്ങളാൽ ജലവിതരണം തടസ്സപ്പെടുന്നതു പതിവായിട്ടുണ്ട്.

∙ നഗരത്തിൽ മാലിന്യ സംസ്കരണത്തിനു രാജ്യാന്തര നിലവാരത്തിലുള്ള യൂണിറ്റുകൾ സ്ഥാപിക്കുന്നതിനു സഹായം ആവശ്യമാണ്.

∙ ബൈപാസ് ഭാഗത്തേക്കു ഫയർ സ്റ്റേഷൻ മാറ്റണം. ഫയർ സ്റ്റേഷൻ സ്ഥിതി ചെയ്യുന്ന നിലവിലെ കെട്ടിടവും സമീപത്ത് കാടുപിടിച്ചു കിടക്കുന്ന സ്ഥലവും പൊതുജനങ്ങൾക്കു പ്രയോജനകരമായ രീതിയിൽ മറ്റ് ആവശ്യങ്ങൾക്കായി പ്രയോജനപ്പെടുത്തണം.

കെ.‍ഡി.മോഹനൻ(പായിപ്പാട് പഞ്ചായത്ത് പ്രസിഡന്റ് )

∙ പടിഞ്ഞാറൻ ഭാഗത്തുള്ള 1, 15, 16 വാർഡുകളുടെ വികസനത്തിനു പ്രത്യേക ഇടപെടൽ വേണം. എസി റോഡരികിലുള്ള പ്രദേശത്തു വെള്ളം കയറുന്നതും ജനങ്ങൾ ദുരിതത്തിലാകുന്നതും പതിവാണ്. നല്ല റോഡുകളും പട്ടയ പ്രശ്നത്തിനു പരിഹാരവും വേണം.

∙ കവിയൂർ റോഡ് നിർമാണം പൂർത്തിയാക്കാൻ അടിയന്തരമായി ഇടപെടണം. റോഡ് വികസനം പൂർത്തിയാക്കുന്നതിനൊപ്പം മാത്രമേ പഞ്ചായത്തിലേക്കുള്ള പൈപ്പ് ലൈനുകളുടെ ജോലികളും പൂർത്തിയാക്കാൻ സാധിക്കൂ.

∙ ഓമണ്ണ്, മച്ചിപ്പള്ളി, പാറ, മുണ്ടുകോട്ട പ്രദേശങ്ങൾ തുടങ്ങി 7, 8, 9, 10 വാർഡുകളിലെ ജലക്ഷാമം പരിഹരിക്കാൻ സഹായം ആവശ്യമാണ്.

കെ.എൻ.സുവർണകുമാരി(തൃക്കൊടിത്താനം പഞ്ചായത്ത് പ്രസിഡന്റ് )

∙ പഞ്ചായത്തിന്റെ 1, 16, 18, 19 വാർഡുകളിലൂടെ കടന്നുപോകുന്ന പൊട്ടശേരി - ഇരുപ്പ തോടിന് ആഴം കൂട്ടുന്നതിനു സഹായം വേണം. വെള്ളപ്പൊക്ക ഭീഷണി നിലനിൽക്കുന്ന പ്രദേശങ്ങളാണിത്.

∙ പഞ്ചായത്തിന്റെ ഉയർന്ന പ്രദേശങ്ങളിൽ പൈപ്പിലൂടെ വെള്ളം എത്തുന്നില്ല. കൊടിനാട്ടുകുന്ന്, അമര, കടമാഞ്ചിറ, ചക്രാത്തിക്കുന്ന് എന്നീ ഭാഗങ്ങളിലും ജലക്ഷാമം രൂക്ഷമാണ്. ‍ഇതിനു പരിഹാരം വേണം.

∙ അത്യാധുനിക സൗകര്യങ്ങളോടെ നിർമിച്ച തൃക്കൊടിത്താനം ഹയർ സെക്കൻഡറി സ്കൂളിൽ ഇതിന് അനുയോജ്യമായ രീതിയിലുള്ള ഫർണിച്ചർ ആവശ്യമാണ്.

സോഫി ലാലിച്ചൻ(വാഴപ്പള്ളി പഞ്ചായത്ത് പ്രസിഡന്റ് )

∙‍ അനേകം ആളുകൾ ചികിത്സ തേടി എത്തുന്ന വാഴപ്പള്ളി പിഎച്ച്സിയിൽ മതിയായ സൗകര്യങ്ങൾ ഇല്ല. ഇതിനു പരിഹാരം കാണണം. പുതിയ കെട്ടിടം ഉൾപ്പെടെയുള്ള ആവശ്യങ്ങളുമുണ്ട്.

∙ പഞ്ചായത്ത് കമ്യൂണിറ്റി ഹാൾ പുതുക്കി നിർമിക്കണം. പഞ്ചായത്തുമായി ബന്ധപ്പെട്ട യോഗങ്ങൾ നടത്തുന്നതിനും മറ്റ് ആവശ്യങ്ങൾക്കും ഇത് ഏറെ സഹായകരമാകും. നിലവിലെ ഹാളിൽ ഒട്ടേറെ പരിമിതികൾ ഉണ്ട്.

∙ പഞ്ചായത്തിന്റെ എല്ലാ വാർഡുകളിലും ജലക്ഷാമം നേരിടുന്നുണ്ട്. ഇതിന് അടിയന്തര പരിഹാരം വേണം.

സുജാത സുശീലൻ(കുറിച്ചി പഞ്ചായത്ത് പ്രസിഡന്റ് )

∙ 20 വാർഡുകളിലെയും ജലക്ഷാമത്തിനു ശാശ്വത പരിഹാരം കാണുന്നതിന് പദ്ധതി ആവശ്യമാണ്. പഞ്ചായത്ത് സ്വന്തമായി പദ്ധതി രൂപീകരിക്കണമെന്നാണ് ജനങ്ങളുടെ ആവശ്യം.

∙ മന്ദിരം കമ്യൂണിറ്റി ഹെൽത്ത് സെന്ററിൽ ഒട്ടേറെ അസൗകര്യങ്ങളുണ്ട്. ആധുനിക രീതിയിലുള്ള കെട്ടിടം വേണം. ഗൈനക്കോളജിസ്റ്റ് അടക്കം 24 മണിക്കൂർ ഡോക്ടറുടെ സേവനം വേണം.

∙ ചാലച്ചിറ തോട് പുറമ്പോക്കിൽ ഒട്ടേറെ കുടുംബങ്ങൾ താമസിക്കുന്നുണ്ട്. തോടിനും റോഡിനും ഇടയിലുള്ള സംരക്ഷണ ഭിത്തി ഇടിയുന്നതു വീടുകൾക്കു ഭീഷണിയാണ്. സംരക്ഷണ ഭിത്തി നിർമിക്കുന്നതിനു സഹായം വേണം.

മണിയമ്മ രാജപ്പൻ(മാടപ്പള്ളി പഞ്ചായത്ത് പ്രസിഡന്റ് )

∙ മാമ്മൂട് - പായിപ്പാട് റോഡിന്റെ വശങ്ങളിൽ നടപ്പാതകൾ നിർമിക്കണം. പല ഭാഗങ്ങളിലും ആളുകൾക്കു നടക്കാൻ പോലും കഴിയാത്ത അവസ്ഥയാണ്. ഈ റോഡിന്റെ ഭാഗമായ ചേന്നമറ്റം പാലം പുതുക്കി നിർമിക്കണം.

∙ തെങ്ങണ ജംക്‌ഷനിലെ വെള്ളക്കെട്ട് പൂർണമായി ഒഴിവാക്കാൻ സഹായം ആവശ്യമാണ്. ഓടകളുടെ നിർമാണം പൂർത്തിയാക്കണം. ‘തെങ്ങണ പ്രോജക്ട്’ നടപ്പാക്കുമ്പോൾ എംഎൽഎയുടെ കൂടുതൽ സഹകരണം വേണം. ‍

∙ ചങ്ങനാശേരി ജല അതോറിറ്റി ഓഫിസിനു കീഴിൽ മാടപ്പള്ളി പഞ്ചായത്തിനെ പൂർണമായി ഉൾപ്പെടുത്തി ജലക്ഷാമത്തിനു പരിഹാരം കാണണം. എല്ലാ വാർഡുകളിലും ജലക്ഷാമം ഉണ്ട്.