ഉണ്ണിക്കുട്ടന് വീട്ടിലേക്ക് വഴിയായി; ചാണ്ടി ഉമ്മൻ എംഎൽഎ ഉദ്ഘാടനം ചെയ്തു

അയർക്കുന്നം ∙ ഓട്ടിസവും, ശാരീരിക അസ്വസ്ഥകളുമുള്ള മനക്കുന്നേൽ ഉണ്ണിക്കുട്ടന് (16) പത്താം വാർഡിലെ കോൺഗ്രസ് പ്രവർത്തകർ ഒരുക്കിയ സ്നേഹവഴിയിലൂടെ ഇനി വീട്ടിലെത്താം. അയർക്കുന്നം ഗ്രാമപ്പഞ്ചായത്തിലെ 23, 24 കോൺഗ്രസ് ബൂത്ത് കമ്മിറ്റി നിർമിച്ചു നൽകിയ റോഡ് ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. കുന്നിന് സമാനമായ സ്ഥലത്തു സ്ഥിതിചെയ്യുന്ന  വീട്ടിൽ നിന്നും കഴിഞ്ഞ ദിവസം വരെ എവിടെയെങ്കിലും പോകണമെങ്കിൽ പ്രധാന റോഡുവരെ ഉണ്ണിക്കുട്ടനെ  എടുത്തുകൊണ്ട് പോകേണ്ട സ്ഥിതിയായിരുന്നു.

ശാരീരിക അസ്വാസ്ഥ്യമുള്ള ഉണ്ണിക്കുട്ടന്റെ ഈ ദുരിതം കണ്ട് കോൺഗ്രസ് പ്രവർത്തകർ ഒന്നിച്ച് വീട്ടുമുറ്റത്തേക്ക് വാഹനം എത്തുന്ന രീതിയിൽ 100 മീറ്റർ ദൂരം കോൺക്രീറ്റ് ചെയ്തു നൽകുകയായിരുന്നു. ഒരു ലക്ഷത്തി ഇരുപതിനായിരം രൂപയാണ് നിർമാണ ചെലവ്. യുഡിഎഫ് കൺവീനർ ഫിൽസൻ മാത്യൂസ്, കെ.സി.മത്തായി കറ്റുവെട്ടിക്കൽ, ഷിജോ തേക്കിയിൽ, റോബിൻ ഈന്തുകാട്ടിൽ, ജോർജ് ചാരമംഗലം, അയർക്കുന്നം മഹിള കോൺഗ്രസ് പ്രസിഡന്റ് ലീലാമ്മ ബാബു എന്നിവർ പ്രസംഗിച്ചു.