പൈപ്പ് പൊട്ടൽ: എംസി റോഡ് തകർന്ന് ജലം പാഴാകുന്നു

അടൂർ ∙ ജലവിതരണ പദ്ധതിയുടെ പൈപ്പിലൂടെ വെള്ളം കിട്ടാതെ ജനങ്ങൾ വലയുമ്പോൾ അടൂർ സെൻട്രൽ ജംക്‌ഷനു തെക്കു ഭാഗത്തായി ജല വിതരണ പദ്ധതിയുടെ പൈപ്പ് പൊട്ടി എംസി റോഡിന്റെ മധ്യ ഭാഗം തകർന്ന് വെള്ളം പാഴായിക്കൊണ്ടിരിക്കുന്നു. ഇവിടെ പൈപ്പ് പൊട്ടി റോഡു തകർന്ന് വെള്ളം പാഴാകാൻ തുടങ്ങിയിട്ട് ദിവസങ്ങൾ ഏറെയായിട്ടും ഇതുവരെ പൈപ്പ് തകർന്ന ഭാഗം നന്നാക്കിയിട്ടില്ല. ഇതു കാരണം വെള്ളം പുറത്തേക്ക് ഒഴുകി റോഡ് വലിയ കുഴിയായി കൊണ്ടിരിക്കുകയാണ്.

 ദിവസേന നൂറുകണക്കിനു വാഹനങ്ങൾ പോകുന്ന എംസി റോഡ് കുഴിയായി കൊണ്ടിരുന്നിട്ടും പൈപ്പ് പൊട്ടിയത് മാറ്റി പുതിയ പൈപ്പ് സ്ഥാപിക്കുന്ന കാര്യത്തിൽ അധികൃതർ അനാസ്ഥ കാട്ടുകയാണ്. ഈ ഭാഗത്തു പൈപ്പ് പൊട്ടി വെള്ളം പാഴായിക്കൊണ്ടിരിക്കുമ്പോൾ ഈ പൈപ്പുലൈനുകളിൽ കൂട്ടി വെളളമെത്തേണ്ട പ്രദേശങ്ങളിൽ വെള്ളം കിട്ടാത്ത സ്ഥിതിയുമാണ്. എന്നിട്ടു പോലും ഇതിന്റെ ഗൗരവം മനസ്സിലാക്കി പൈപ്പ് പൊട്ടിയത് അടച്ച് വെള്ളം പാഴാകുന്നത് ഒഴിവാക്കാൻ ജല അതോറിറ്റി അധികൃതർ തയാറാകാത്തതിനെതിരെ പ്രതിഷേധം വ്യാപകമായി.