നവകേരള ബസിന് സ്കൂൾ മതിൽ പൊളിച്ചു; അഴുക്കുചാൽ നികത്തി

തിരൂർ (മലപ്പുറം) ∙ മുഖ്യമന്ത്രിയും മന്ത്രിമാരും സഞ്ചരിക്കുന്ന നവകേരള ബസിനു വേദിക്കരികിലെത്താൻ സ്കൂളിന്റെ മതിൽ പൊളിച്ചു. തിരൂർ ബോയ്സ് ഹയർസെക്കൻഡറി സ്കൂളിന്റെ മതിലാണു പൊളിച്ചത്. ഇവിടെ പ്രധാന കവാടത്തിലൂടെ ബസിന് ഉള്ളിലേക്കു കടക്കാൻ സാധിക്കില്ല. മതിൽ പൊളിച്ച ഭാഗത്തുണ്ടായിരുന്ന അഴുക്കുചാൽ പാറപ്പൊടിയിട്ടു മൂടി ബസിനു വഴിയൊരുക്കി.

പരിപാടി കഴിഞ്ഞാലുടൻ മതിലിന്റെ പൊളിച്ച ഭാഗം തിരികെ നിർമിച്ചു നൽകുമെന്നു സംഘാടക സമിതി ചെയർമാനും ബ്ലോക്ക് പഞ്ചായത്ത് പ്രസിഡന്റുമായ യു. സൈനുദ്ദീൻ പറഞ്ഞു. സർക്കാരിന്റെ വാർഷികാഘോഷ പരിപാടിക്കും മതിൽ പൊളിക്കുകയും തുടർന്ന് കെട്ടിക്കൊടുക്കുകയും ചെയ്തിരുന്നെന്നു സൈനുദ്ദീൻ പറഞ്ഞു.