തിരഞ്ഞെടുപ്പ് തിരിച്ചടി: ക്ഷേമപെൻഷൻ കുടിശികയടക്കം നൽകുന്നു

തിരുവനന്തപുരം ∙ ലോക്സഭാ തിരഞ്ഞെടുപ്പിലെ തിരിച്ചടിക്കു മുഖ്യകാരണം ക്ഷേമപെൻഷൻ വിതരണത്തിലെ പാളിച്ചയാണെന്ന തിരിച്ചറിവുണ്ടായതോടെ കുടിശികയടക്കം പെൻഷൻ വിതരണം ചെയ്യാൻ സർക്കാർ. ഒരു മാസത്തെ പെൻഷൻ തുകയായ 1,600 രൂപ അടുത്തയാഴ്ച വിതരണം ചെയ്യുമെന്നും 5 മാസത്തെ കുടിശിക തുകയായ 8,000 രൂപ അധികം വൈകാതെ നൽകുമെന്നും മന്ത്രി കെ.എൻ.ബാലഗോപാൽ നിയമസഭയിൽ പ്രഖ്യാപിച്ചു. 6 മാസത്തെ ക്ഷേമപെൻഷൻ കുടിശികയായതു ചൂണ്ടിക്കാട്ടിയുള്ള പി.സി.വിഷ്ണുനാഥിന്റെ അടിയന്തരപ്രമേയ നോട്ടിസിനു മറുപടി പറയുമ്പോഴായിരുന്നു മന്ത്രിയുടെ പ്രഖ്യാപനം. വരുന്ന ലോക്സഭാ, നിയമസഭാ ഉപതിരഞ്ഞെടുപ്പുകൾക്കു മുൻപ് കുടിശിക വിതരണം ചെയ്യാനാണു ധനവകുപ്പ് തിരക്കിട്ട നീക്കം നടത്തുന്നത്.