‘സ്ക്രീൻ ടൈം’ നിയന്ത്രണം‘ കളിയും കാര്യവും’; ബോധവൽക്കരണ പരിപാടിക്കു സ്കൂളുകളിൽ തുടക്കം

കൊച്ചി ∙ കുട്ടികളുടെ അമിത ‘സ്ക്രീൻ ടൈം’ കുറയ്ക്കുന്നതിനായി ഫെഡറൽ ബാങ്കും മലയാള മനോരമയും ചേർന്നു നടപ്പാക്കുന്ന ‘കളിയും കാര്യവും’ ബോധവൽക്കരണ പരിപാടിക്കു തുടക്കമായി. ഇന്നലെ കടവന്ത്ര കേന്ദ്രീയ വിദ്യാലയ കടവന്ത്രയിലും തിരുവാണിയൂർ കൊച്ചിൻ റിഫൈനറീസ് സ്കൂളിലുമാണ് ആരംഭിച്ചത്. അടുത്ത ദിവസങ്ങളിൽ കൂടുതൽ സ്കൂളുകളിൽ പരിപാടി അവതരിപ്പിക്കും. അമിതമായ സ്ക്രീൻ ഉപയോഗത്തിന്റെ ദോഷങ്ങൾ, സമ്പാദ്യത്തിന്റെ ആവശ്യകത, സാമ്പത്തിക സുരക്ഷ എന്നീ വിഷയങ്ങളിലാണു കുട്ടികളെ ബോധവൽക്കരിക്കുന്നത്. 

കേരളത്തിന്റെ പാരമ്പര്യ കലാരൂപങ്ങളായ ചാക്യാർ കൂത്ത്, തെയ്യം എന്നിവയിലൂടെയാണു ബോധവൽക്കരണം. മാനസികാരോഗ്യ വിദഗ്ധരുടെ സെഷനുകളും ഒരുക്കിയിരുന്നു. കുട്ടികൾക്കു പുറമേ, അധ്യാപകരും പരിപാടിയിൽ പങ്കെടുത്തു. ചാക്യാർ കൂത്ത് പോലുള്ള കലാരൂപങ്ങൾ പല കുട്ടികളും കാണുന്നതു തന്നെ ആദ്യമായിരുന്നു. സാമ്പത്തിക സുരക്ഷയെക്കുറിച്ചുള്ള പഠനവും പലർക്കും കൗതുകമായി. വരും ദിവസങ്ങളിൽ സംസ്ഥാനത്തെ വിവിധ സ്കൂളുകളിൽ പരിപാടി തുടരും. 

ജില്ലയിൽ തിരുവാണിയൂർ ഗ്ലോബൽ പബ്ലിക് സ്കൂൾ, തൃപ്പൂണിത്തുറ എൻഎസ്എസ് എച്ച്എസ്എസ്, ബ്രോഡ്‌‌‌‌‌‌‌വേ സെന്റ് മേരീസ് കോൺവന്റ് ഗേൾസ് എച്ച്എസ്എസ്, കലൂർ ഗ്രീറ്റ്സ് പബ്ലിക് സ്കൂൾ, ഇടപ്പള്ളി സെന്റ് ജോർജ് ഹൈസ്കൂൾ, എരൂർ ഭവൻസ് വിദ്യാമന്ദിർ, ഗിരിനഗർ ഭവൻസ് വിദ്യാമന്ദിർ എന്നിവിടങ്ങളിൽ പദ്ധതി നടപ്പാക്കും. കുട്ടികളുടെ മാനസികാരോഗ്യവും സാമ്പത്തിക അവബോധവും വളർത്തുന്നതിൽ ഈ പരിപാടി സുപ്രധാന പങ്കു വഹിക്കുമെന്നാണു പ്രതീക്ഷ.