സ്ഥലപരിമിതി തോറ്റു, വീട് ജയിച്ചു; ഇവിടെ നിറയെ സന്തോഷം!

സ്ഥലപരിമിതിയിൽ നിന്നുകൊണ്ടു മനസ്സിനിഷ്ടപ്പെട്ട വീട്, പണിതീർത്ത് കിട്ടിയതിന്റെ സന്തോഷത്തിലാണ് തിരുവനന്തപുരം സ്വദേശി ലിനുരാജും കുടുംബവും. 

4.75 സെന്റിൽ 3000 സ്ക്വയർഫീറ്റിൽ ലിവിങ്, ഡൈനിങ്, കിച്ചൻ, പൂജാമുറി, ഹോംതിയറ്റർ, ബാർ കൗണ്ടർ, അറ്റാച്ച്ഡ് ബാത്റൂമോടു കൂടിയ 4 കിടപ്പുമുറികൾ, ഇന്റേണൽ കോർട്ട്യാർഡ് എന്നിങ്ങനെ ഒരു മിഡിൽ ക്ലാസ് ഫാമിലിക്ക് വേണ്ട എല്ലാ സൗകര്യങ്ങളും പ്രൗഢഗംഭീരമായി ഒരുക്കിയത് എസ് ഡി സി ആർക്കിടെക്റ്റ്സിലെ ഡിസൈനറായ രാധാകൃഷ്ണനാണ്.

പ്രദേശത്തെ മറ്റു വീടുകളിൽ നിന്നും തികച്ചും വ്യത്യസ്തമായി സ്ട്രെയിറ്റ് ലൈൻ ഫോർമാറ്റിൽ ഡിസൈൻ ചെയ്ത എലവേഷൻ. സ്റ്റോൺ ക്ലാഡിങ്ങും, ലൂവറുകളും പുറംകാഴ്ചയ്ക്ക് മാറ്റുകൂട്ടുന്നു.

തുറസായ ശൈലിയിലാണ് അകത്തളങ്ങൾ ഒരുക്കിയത്. ലിവിങ്, ഡൈനിങ്, കിച്ചൻ എന്നിവ പാർട്ടീഷനുകള്‍ ഒഴിവാക്കി ഡിസൈൻ െചയ്തു. അതിനാൽ അകത്തളങ്ങൾ വിശാലമാണ്. കണ്ണിന് അലോസരമാകാതെ ന്യൂട്രൽ നിറങ്ങൾ മാത്രമാണ് ഇന്റീരിയറിൽ ഉപയോഗിച്ചിട്ടുള്ളത്. 

ഇന്റേണൽ കോർട്യാർഡാണ്‌ ഹൈലൈറ്റ്. സ്കൈലൈറ്റിൽ നിന്ന് നേരിട്ടെത്തുന്ന സൂര്യപ്രകാശവും, ഡൈനിങ് സ്പേസിലെ ഡോർ കം വിന്റോയിലൂടെ എത്തുന്ന കാറ്റും വെളിച്ചവും ലിവിങ് ഏരിയയിലും ഡൈനിങ് ഏരിയയിലും കിച്ചനിലും സദാ കുളിർമ്മ നില നിർത്തുന്നു.  

സ്റ്റെയർകേസിനു താഴെയും പച്ചപ്പിന്റെ സാന്നിദ്ധ്യം അറിയിക്കുന്ന കോർട്യാർഡിന് സ്ഥാനം നൽകി. ഗ്ലാസും വുഡും ആണ് സ്റ്റെയർകേസിന് ഉപയോഗിച്ചിട്ടുള്ളത്. ലൈറ്റ് ഫിറ്റിങ്ങുകളും ഹാങ്ങിങ് ലൈറ്റുകളും ഇന്റീരിയറിന്റെ മനോഹാരിത  കൂട്ടുന്നു. തടിപ്പണികൾക്കെല്ലാം അലുമിനിയം കോംപോസിറ്റ് പാനലാണ് ഉപയോഗിച്ചിരിക്കുന്നത്. 

അലങ്കാരങ്ങളെല്ലാം ഒഴിവാക്കിക്കൊണ്ട് സ്വച്ഛത നിറയും വിധമാണ് എല്ലാം ബെഡ്റൂമുകളും. വാർഡ്രോബും ഡ്രസിങ് ഏരിയയും ക്രമീകരിച്ചിരിക്കുന്നു. മുറികളിലെ നീളൻ ജനാലകൾ വെളിച്ചത്തിനൊപ്പം ശുദ്ധവായുവും ഉള്ളിലേക്കെത്തിക്കുന്നു.

വുഡൻ ഫിനിഷിങ്ങിന്റെ ചന്തമാണ് അടുക്കളയെ മനോഹരമാക്കുന്നത്. കോഫി ടേബിളിനും ഇവിടെത്തന്നെ സ്ഥാനം നൽകി. ആവശ്യത്തിന് സ്റ്റോറേജ് യൂണിറ്റുകളും ഉൾച്ചേർത്തിട്ടുണ്ട്. കൗണ്ടർ ടോപ്പിന് നാനോവൈറ്റാണ് ഉപയോഗിച്ചിട്ടുള്ളത്.

ഇടത്തരം കുടുംബത്തിന്റെ സ്വപ്നങ്ങൾ സഫലമാക്കാൻ സ്ഥലപരിമിതി പ്രശ്നമല്ല എന്നു തെളിയിക്കുകയാണ് ഈ സ്വപ്നഭവനം.

Project Facts

ക്ലൈന്റ് – ലിനു രാജ്

സ്ഥലം – തിരുവനന്തപുരം

പ്ലോട്ട് – 4.75 സെന്റ്

വിസ്തീർണം – 3000 sqft

പണി പൂർത്തിയായ വർഷം – 2019

‍ഡിസൈൻ – എസ് ഡി സി ആർക്കിടെക്റ്റ്സ്, തിരുവനന്തപുരം

nrks2003@gmail.com 

Ph – 0471 2363110, 9447206623