മാലിക്കിന്‍റെ നിക്കാഹ് ലക്ഷദ്വീപില്‍; ഹിറ്റായി പ്രണയപ്പാട്ട്, വിഡിയോ

ഫഹദ് ഫാസിലിനെ നായകനാക്കി മഹേഷ് നാരായണൻ സംവിധാനം ചെയ്യുന്ന ‘മാലിക്കി’ലെ വിഡിയോഗാനം പുറത്തിറങ്ങി. ‘തീരമേ’ എന്നു തുടങ്ങുന്ന പാട്ട് കെ.എസ്.ചിത്രയും സൂരജ് സന്തോഷും ചേർന്നാണ് ആലപിച്ചത്. അൻവർ അലിയുടെ വരികൾക്ക് സുഷിൻ ശ്യാം ഈണം നൽകി. ചുരുങ്ങിയ സമയത്തിനകം ശ്രദ്ധേയമായ ഗാനം മികച്ച പ്രതികരണങ്ങളോടെ ട്രെൻഡിങ്ങിൽ ഇടം പിടിച്ചു. ലക്ഷദ്വീപില്‍ വച്ചാണ് പാട്ട് ചിത്രീകരിച്ചിരിക്കുന്നത്. ഗാനരംഗങ്ങളിൽ മാലിക്കിന്റെ പ്രണയവും നിക്കാഹും ഹൃദ്യമായി അവതരിപ്പിച്ചിരിക്കുന്നു. പാട്ടിന്റെ ലിറിക്കൽ വിഡിയോയും നിരവധി ആസ്വാദകരെ നേടിയിരുന്നു. 

ജൂലൈ 15ന് ആമസോൺ പ്രൈമിലൂടെയാണ് ‘മാലിക്’ റിലീസ് ചെയ്യുന്നത്. ഫഹദിന്റെ കരിയറിലെ ഏറ്റവും മുതൽമുടക്കുള്ള സിനിമ കൂടിയാണ് ‘മാലിക്’. 27 കോടിയോളം ബജറ്റുള്ള ചിത്രത്തിനു വേണ്ടി 20 കിലോയോളം ഭാരം കുറച്ച് ഫഹദ് പ്രേക്ഷകരെ ഞെട്ടിച്ചിരുന്നു. ആന്റോ ജോസഫ് ഫിലിം കമ്പനിയുടെ ബാനറിൽ ആന്റോ ജോസഫ് നിർമിക്കുന്ന ചിത്രത്തിൽ ദിലീഷ് പോത്തൻ, വിനയ് ഫോർട്ട്, നിമിഷ സജയൻ, മാമൂക്കോയ എന്നിവരും അഭിനയിക്കുന്നുണ്ട്.