LIVE

അംബേദ്കർക്കെതിരെ അപകീർത്തി പരാമർശം: അമിത് ഷാ മാപ്പ് പറയണമെന്ന് പ്രതിപക്ഷം, ഇരുസഭകളും പിരിഞ്ഞു

ന്യൂഡൽഹി∙ പ്രതിപക്ഷ ബഹളത്തെ തുടർന്ന് പാർലമെന്റിലെ ഇരുസഭകളും ഇന്നത്തേക്ക് പിരിഞ്ഞു. ബി.ആർ.അംബേദ്കർക്കെതിരായ കേന്ദ്ര ആഭ്യന്തരമന്ത്രി അമിത് ഷായുടെ അപകീർത്തി പരാമർശത്തിനെതിരെയാണ് പാർലമെന്റിനകത്തും പുറത്തും ഇന്ന് പ്രതിപക്ഷ പ്രതിഷേധം ആളിക്കത്തിയത്. അംബേദ്കറുടെ ചിത്രവുമായി എത്തിയ പ്രതിപക്ഷ എംപിമാർ അമിത് ഷാ മാപ്പു പറയണമെന്ന് ആവശ്യപ്പെട്ടു. തുടർന്ന് സഭയിലും അംബേദ്കറുടെ ചിത്രങ്ങൾ ഉയർത്തിക്കാട്ടി. 

പ്രതിപക്ഷം നടുത്തളത്തിലിറങ്ങിയതോടെ ഇന്ന് രണ്ടു തവണയാണ് ഇരുസഭകളും തടസപ്പെട്ടത്. ഉച്ചയ്ക്ക് രണ്ട് മണിയോടെ സഭകൾ വീണ്ടും ചേർന്നെങ്കിലും പ്രതിപക്ഷ ബഹളം തുടരുകയായിരുന്നു. ഇതോടെ സഭാ നടപടിക്രമങ്ങൾ നിർത്തിവച്ചു. അമിത് ഷാ രാജി വയ്ക്കണമെന്ന് ആവശ്യപ്പെട്ടായിരുന്നു രാജ്യസഭയില്‍ പ്രതിപക്ഷ എംപിമാർ  പ്രതിഷേധ മുദ്രാവാക്യം മുഴക്കിയത്. ഇരുസഭകളും നാളെ രാവിലെ 11 മണിയ്ക്ക് വീണ്ടും ചേരും.