അതിമനോഹരം: വിദ്യ ഉണ്ണിയുടെ വിവാഹവിഡിയോ

നടി ദിവ്യ ഉണ്ണിയുടെ സഹോദരിയും നടിയുമായ വിദ്യ ഉണ്ണിയുടെ വിവാഹവിഡിയോ പുറത്തിറങ്ങി. സിങ്കപ്പൂരില്‍ ടാറ്റ കമ്മ്യൂണിക്കേഷന്‍സില്‍ ഉദ്യോഗസ്ഥനാണ് ചെന്നൈ സ്വദേശിയായ സഞ്ജയ് ആണ് വിദ്യയുടെ കഴുത്തിൽ മിന്നുചാർത്തിയത്. സിനിമ പോലെ മനോഹരമായ വിഡിയോ ആണ് വിവാഹത്തിനായി ഇവർ അണിയിച്ചൊരുക്കിയത്.

വിവാഹചടങ്ങുകളും ഫോട്ടോഷൂട്ടും ദിവ്യ ഉണ്ണി ഉൾപ്പടെയുള്ളവരുടെ വിവാഹാശാംസകളും  വിവാഹവിഡിയോയിൽ കാണാം. ഡാൻസും പാട്ടുമൊക്കെയായി വലിയ ആഘോഷമായാണ് ചടങ്ങുകൾ സംഘടിപ്പിച്ചത്.

‘ഞങ്ങളെ സംബന്ധിച്ചടത്തോളം വിദ്യയുടെ വിവാഹം, ഓർമയുടെ മണിച്ചെപ്പിൽ സൂക്ഷിക്കാൻ പറ്റിയ മൂന്നുനാല് ദിവസങ്ങളായിരുന്നു.’–ദിവ്യ ഉണ്ണി പറയുന്നു.

‘കോളജിൽ എത്തിയ ആദ്യ ദിനമാണ് സഞ്ജയ്‌യെയും ആദ്യമായി പരിചയപ്പെടുന്നത്. പിന്നീട് ഞങ്ങൾ സുഹൃത്തുക്കളായി. ആ സൗഹൃദം വർഷങ്ങൾ കഴിയുമ്പോൾ മനോഹരമായ ബന്ധമായി മാറുകയായിരുന്നു.’–വിദ്യ ഉണ്ണി പറഞ്ഞു.

ചേച്ചിക്ക് പിന്നാലെ വിദ്യ ഉണ്ണിയും സിനിമയിലെത്തിയിരുന്നു. കുഞ്ചാക്കോ ബോബനും ഭാവനയും നായികാനായകന്‍മാരായെത്തിയ ഡോക്ടര്‍ ലവിലൂടെയായിരുന്നു വിദ്യ തുടക്കം കുറിച്ചത്. നടിയുടെ അഭിനയം ഏറെ ശ്രദ്ധിക്കപ്പെടുകയും ചെയ്തു.  കലാപാരമ്പര്യമുള്ള കുടുംബത്തില്‍ നിന്നും സിനിമയിലേക്കെത്തിയ വിദ്യ പിന്നീട് ജോലിയിൽ ശ്രദ്ധ കേന്ദ്രീകരിക്കുകയായിരുന്നു.

സഹോദരിയെപ്പോലെ തന്നെ നൃത്തത്തിലും വിദ്യ മിടുക്കിയാണ്. നിരവധി നൃത്ത പരിപാടികളിലൂടെ വിദ്യ പ്രേക്ഷകര്‍ക്ക് മുന്നിലെത്താറുണ്ട്. ചേച്ചി ദിവ്യ ഉണ്ണിക്കൊപ്പവും വിദ്യ സ്റ്റേജ് പരിപാടികളിൽ പങ്കെടുക്കാറുണ്ട്.