‘ജീവൻ അപകടത്തിലാകുന്ന തരത്തിൽ വാഹനമോടിച്ചു’: കളർകോട് അപകടത്തിൽ കെഎസ്ആർടിസി ഡ്രൈവർ പ്രതി
Mail This Article
ആലപ്പുഴ∙ കളർകോട് 5 മെഡിക്കൽ വിദ്യാർഥികളുടെ മരണത്തിനിടയാക്കിയ വാഹനാപകടത്തിൽ കെഎസ്ആർടിസി ബസിന്റെ ഡ്രൈവറെക്കൂടി പ്രതിചേർത്ത് എഫ്ഐആർ. മനുഷ്യജീവന് ആപത്തുണ്ടാക്കുന്ന തരത്തിൽ വാഹനമോടിച്ചുവെന്ന കുറ്റമാണ് ഡ്രൈവർക്കെതിരെ ചുമത്തിയത്. പ്രാഥമികമായി ലഭിച്ച വിവരങ്ങളുടെ അടിസ്ഥാനത്തിലാണ് എഫ്ഐആർ തയാറാക്കിയതെന്നു പൊലീസ് പറഞ്ഞു.
കെഎസ്ആർടിസി ഡ്രൈവറുടെ അശ്രദ്ധയാണ് അപകടകാരണമെന്നായിരുന്നു ആദ്യം ലഭിച്ച വിവരം. എന്നാൽ പിന്നീടാണ് വിദ്യാർഥികൾ സഞ്ചരിച്ച കാർ തെന്നി ബസിലേക്ക് ഇടിച്ചുകയറുകയായിരുന്നുവെന്ന് വ്യക്തമായത്. സിസിടിവി ദൃശ്യങ്ങളും കൂടുതൽ സാക്ഷിമൊഴികളും രേഖപ്പെടുത്തുന്നതോടെ എഫ്ഐആറിൽ മാറ്റം വരുമെന്നും പൊലീസ് അറിയിച്ചു.
- 3 month agoDec 03, 2024 07:42 PM IST
ദൃശ്യങ്ങളും മൊഴികളും അടിസ്ഥാനമാക്കി കേസിൽ മാറ്റം വരുമെന്ന് പൊലീസ്.
- 3 month agoDec 03, 2024 07:36 PM IST
കളർകോട് വാഹനാപകടത്തിൽ കെഎസ്ആർടിസി ഡ്രൈവറുടെ പേരിൽ കേസെടുത്തു. മനുഷ്യ ജീവന് അപകടം ഉണ്ടാക്കുന്ന വിധത്തിൽ വാഹനം ഓടിച്ചുവെന്നാണ് കേസ്. ആദ്യ വിവരങ്ങളുടെ അടിസ്ഥാനത്തിലുള്ള എഫ്ഐആർ എന്ന് പൊലീസ്.
- 3 month agoDec 03, 2024 06:12 PM IST
ലക്ഷദ്വീപിലെ മുഹമ്മദ് ഇബ്രാഹിമിന്റെ മൃതദേഹം കൊച്ചി ടൗൺ ജുമാ മസ്ജിദിൽ കബറടക്കി. ആയുഷ് ഷാജിയുടെ മൃതദേഹം കാവാലത്തെ വീട്ടിലെത്തിച്ചു. സംസ്കാരം നാളെ.
- 3 month agoDec 03, 2024 06:12 PM IST
ശ്രീദീപ് വത്സന്റെ മൃതദേഹം പാലക്കാട്ടെ വീട്ടിലെത്തിച്ചു. സംസ്കാരച്ചടങ്ങ് പുരോഗമിക്കുന്നു.
- 3 month agoDec 03, 2024 06:12 PM IST
മുഹമ്മദ് അബ്ദുൽ ജബ്ബാറിന്റെ മൃതദേഹം രാത്രി കണ്ണൂർ മാട്ടൂലിൽ കബറടക്കും. ദേവനന്ദന്റെ മൃതദേഹം കോട്ടയം മറ്റക്കരയിലെ കുടുംബവീട്ടിലെത്തിച്ചു. സംസ്കാരം നാളെ നടക്കും.
- 3 month agoDec 03, 2024 12:23 PM IST
മന്ത്രിമാരായ സജി ചെറിയാൻ, വീണാ ജോർജ് എന്നിവർ പൊതുദർശനത്തിൽ പങ്കെടുക്കാനെത്തി
- 3 month agoDec 03, 2024 11:56 AM IST
ആലപ്പുഴ വണ്ടാനം മെഡിക്കൽ കോളജിൽ പൊതുദർശനം ആരംഭിച്ചു.
- 3 month agoDec 03, 2024 11:56 AM IST
മെഡിക്കൽ കോളജ് ഓഡിറ്റോറിയത്തിലാണ് പൊതുദർശനം.
- 3 month agoDec 03, 2024 11:21 AM IST
മുഖ്യമന്ത്രി പിണറായി വിജയൻ അനുശോചനം രേഖപ്പെടുത്തി
‘‘ആലപ്പുഴ ദേശീയപാതയിൽ കളർകോട് വാഹനാപകടത്തിൽ അഞ്ച് മെഡിക്കൽ വിദ്യാർഥികൾ മരണപ്പെട്ട സംഭവം അത്യന്തം വേദനാജനകമാണ്. ആലപ്പുഴ ഗവ.മെഡിക്കൽ കോളജിലെ ഒന്നാം വർഷ എംബിബിഎസ് വിദ്യാർഥികളായ കണ്ണൂർ സ്വദേശി മുഹമ്മദ് അബ്ദുൾ ജബ്ബാർ, ലക്ഷദ്വീപ് സ്വദേശി മുഹമ്മദ് ഇബ്രാഹിം, മലപ്പുറം സ്വദേശി ദേവാനന്ദൻ, ആലപ്പുഴ സ്വദേശി ആയുഷ് ഷാജി, പാലക്കാട് സ്വദേശി ശ്രീദീപ് എന്നിവർക്കാണ് ജീവൻ നഷ്ടമായത്. ചിലർക്ക് ഗുരുതരമായി പരിക്കേൽക്കുകയും ചെയ്തു. മരണപ്പെട്ടവരുടെ വേർപാടിൽ അനുശോചനം രേഖപ്പെടുത്തുന്നു. കുടുംബാംഗങ്ങളുടെ ദുഃഖത്തിൽ പങ്കു ചേരുന്നു.’’
- 3 month agoDec 03, 2024 10:30 AM IST
‘മഴയത്ത് കാർ ഓവർടേക്ക് ചെയ്ത് ബസിനു നേർക്ക് തിരിഞ്ഞു, സ്കിഡായി; ഇടിക്കില്ലെന്ന് കരുതി’
തിങ്കളാഴ്ച രാത്രിയാണ് കളർകോട് ചങ്ങനാശേരി മുക്ക് ജങ്ഷനിൽ ദേശീയപാതയിൽ കെഎസ്ആർടിസി ബസും കാറും കൂട്ടിയിടിച്ചത്. ആലപ്പുഴ ഗവ.മെഡിക്കൽ കോളജിലെ ഒന്നാംവർഷ എംബിബിഎസ് വിദ്യാർഥികളായ മലപ്പുറം കോട്ടയ്ക്കൽ ശ്രീവർഷത്തിൽ ദേവനന്ദൻ(19), പാലക്കാട് ശേഖരീപുരം ശ്രീവിഹാറിൽ ശ്രീദേവ് വൽസൻ(19), കോട്ടയം ചേന്നാട് കരിങ്കുഴിക്കൽ ആയുഷ് ഷാജി(19), ലക്ഷദ്വീപ് ആന്ത്രോത്ത് പക്രിച്ചിയപ്പുര പി.പി.മുഹമ്മദ് ഇബ്രാഹിം (19), കണ്ണൂർ വെങ്ങര പാണ്ട്യാല വീട്ടിൽ മുഹമ്മദ് അബ്ദുൽ ജബ്ബാർ(19) എന്നിവർ അപകടത്തിൽ മരിച്ചു. 11 വിദ്യാർഥികളാണ് കാറിലുണ്ടായിരുന്നത്. പരുക്കേറ്റ ആറുപേരിൽ രണ്ടുപേരുടെ നില ഗുരുതരമാണ്. കനത്ത മഴയ്ക്കിടെ രാത്രി 9.20നായിരുന്നു അപകടം.
