അടിമുടി ഇന്ത്യക്കാരായി സുനക്കും അക്ഷതയും

ന്യൂഡൽഹി∙ ജി20 ഉച്ചകോടിയിലെത്തിയ വിദേശ പ്രതിനിധികളിൽ കൂടുതൽ ശ്രദ്ധ നേടിയവരിൽ മുന്നിൽ ബ്രിട്ടിഷ് പ്രധാനമന്ത്രി ഋഷി സുനക്കും ഭാര്യ അക്ഷതയും. ഞായറാഴ്ച സുനക് അക്ഷതയ്ക്കൊപ്പം അക്ഷർധാം ക്ഷേത്രം സന്ദർശിക്കുകയും 45 മിനിറ്റ് അവിടെ ചെലവഴിക്കുകയും ചെയ്തു.  ക്ഷേത്രത്തിന്റെ ചരിത്രവും വാസ്തുവിദ്യയും അന്വേഷിച്ചറിഞ്ഞ ദമ്പതികൾ പുഷ്പാർച്ചന നടത്തുകയും ആരതി പൂജയിൽ പങ്കുചേരുകയും ചെയ്തു.

കുർത്തയും ദുപ്പട്ടയുമുൾപ്പെടെ പരമ്പരാഗത വേഷമാണ് അക്ഷത അണിഞ്ഞത്. മഴയത്ത് ഒരു കുടക്കീഴിൽ നിൽക്കുന്ന ദമ്പതിമാരുടെ ചിത്രം സമൂഹമാധ്യമങ്ങളിൽ പ്രചരിച്ചു. നേരത്തെ രാഷ്ട്രപതി ദ്രൗപദി മുർമു നടത്തിയ അത്താഴവിരുന്നിലും ഇന്ത്യൻ വേഷമാണ് അക്ഷത ധരിച്ചത്. ഇൻഫോസിസ് സ്ഥാപകൻ എൻ.ആർ.നാരായണ മൂർത്തിയുടെ മകളാണ് അക്ഷത. ഇന്ത്യയിലേക്കു പുറപ്പെടുന്നതിനു മുൻപ് തന്നെ ഈ യാത്ര തനിക്ക് വളരെയധികം പ്രിയപ്പെട്ടതാണെന്ന് ഋഷി സുനക് പറഞ്ഞിരുന്നു.

English Summary: Rishi Sunak visit temple