അഭ്യൂഹങ്ങൾ ഒടുങ്ങി; വൈ.എസ്. ശർമിള കോൺഗ്രസിൽ

ന്യൂഡൽഹി ∙ അഭ്യൂഹങ്ങൾ യഥാർഥ്യമാക്കി, ആന്ധ്ര മുൻമുഖ്യമന്ത്രി വൈ.എസ്.രാജശേഖര റെഡ്ഡിയുടെ മകൾ വൈ.എസ്.ശർമിളയും അവർ സ്ഥാപിച്ച വൈഎസ്ആർ തെലങ്കാന പാർട്ടിയും കോൺഗ്രസിന്റെ ഭാഗമായി. രാഹുൽ ഗാന്ധിയെ പ്രധാനമന്ത്രിയായി കാണണമെന്ന് ആഗ്രഹിച്ചയാളാണ് തന്റെ പിതാവെന്നും അച്ഛന്റെ സ്വപ്നത്തിനു വേണ്ടി പ്രയത്നിക്കാൻ സന്തോഷമുണ്ടെന്നും ശർമിള പറഞ്ഞു.

ആന്ധ്ര മുഖ്യമന്ത്രിയും സഹോദരനുമായ ജഗൻ മോഹൻ റെഡ്ഡിയെ കണ്ടശേഷമാണ്, ശർമിള ഡൽഹിയിലേക്കു പുറപ്പെട്ടത്. മകന്റെ വിവാഹകാര്യവുമായി ബന്ധപ്പെട്ടാണ് ജഗനെ സന്ദർശിച്ചതെന്നു ശർമിള പറഞ്ഞു. രാവിലെ സോണിയ ഗാന്ധിയെ വീട്ടിലെത്തി കണ്ടു. ശർമിളയുടെ അമ്മ വിജയമ്മയും കോൺഗ്രസിൽ ചേരുമെന്ന് അഭ്യൂഹമുണ്ടായിരുന്നെങ്കിലും ചേർന്നില്ല.