ഓട്ടത്തിനിടെ കാറിന് തീപിടിച്ചു; കുടുംബം സുരക്ഷിതർ

മട്ടന്നൂർ ∙ വായന്തോടിനു സമീപം കാറിനു തീപിടിച്ചു. വിമാനത്താവളത്തിൽനിന്ന് മടങ്ങുകയായിരുന്ന കുടുംബം സഞ്ചരിച്ച കാറിനാണ് തീപിടിച്ചത്. യാത്രക്കാർ പരുക്കേൽക്കാതെ രക്ഷപ്പെട്ടു. ദുബായിൽനിന്ന് തിരിച്ചെത്തിയ ശേഷം നാട്ടിലേക്കു മടങ്ങുകയായിരുന്ന പരിയാരം അമ്മാനപ്പാറ സ്വദേശികളായ ഷെഫീഖ്, ഷെഫീന എന്നിവരും കുടുംബവും സഞ്ചരിച്ച കാറിനാണ് തീപിടിച്ചത്. രണ്ട് കുട്ടികളടക്കം അഞ്ചു പേരാണ് കാറിലുണ്ടായിരുന്നത്. ഉടൻ അഗ്നിരക്ഷാസേനയെത്തി തീയണച്ചു. നാട്ടുകാരും രക്ഷാപ്രവർത്തനം നടത്തി. പിറകിലേക്കു തീപടർന്നില്ല. മുൻഭാഗത്തെ ബാറ്ററിയിലുണ്ടായ ഷോർട് സർക്യൂട്ടാണ് തീപിടിത്തത്തിനു കാരണമെന്ന് അഗ്നിരക്ഷാസേന ഉദ്യോഗസ്ഥർ പറഞ്ഞു.