കടലിൽ മറഞ്ഞ എട്ടാം ഭൂഖണ്ഡം; സീലാൻഡിയയുടെ നിഗൂഢത തേടി ഗവേഷകർ!

നമുക്കെല്ലാം പരിചിതമാണ് ന്യൂസീലൻഡ് എന്ന രാജ്യം. ഓസ്‌ട്രേലിയയ്ക്കു സമീപം സ്ഥിതി ചെയ്യുന്ന ദ്വീപുകൾ. റിച്ചഡ് ഹാഡ്‌ലി, മാർട്ടിൻ ക്രോ, സ്റ്റീറൻ ഫ്‌ളെമിങ് തുടങ്ങിയ പ്രതിഭകൾക്ക് ജന്മം നൽകിയ പ്രസിദ്ധമായ ക്രിക്കറ്റ് ടീമിന്‌റെ നാട്. കിവിപ്പക്ഷികളുടെ ആവാസ വ്യവസ്ഥ. ഇന്ത്യക്കാരുടെ പ്രിയ കുടിയേറ്റ കേന്ദ്രങ്ങളിൽ ഒന്ന്. ലോകനേതാക്കളിലെ ശക്തമായ വനിതാ സാന്നിധ്യമായ ജെസീൻഡ ആൾഡേൺ ഭരിക്കുന്ന നാട്...ഒട്ടേറെ കാര്യങ്ങൾ ന്യൂസീലൻഡുമായി ബന്ധപ്പെട്ടുണ്ട്.

എന്നാൽ ന്യൂസീലൻഡ് എന്ന ദ്വീപരാജ്യം ചരിത്രാതീത കാലഘട്ടത്തിൽ കടലിൽ മറഞ്ഞുപോയ ഒരു ഭൂഖണ്ഡത്തിന്റെ ഇന്നത്തെ ശേഷിപ്പാണെന്നുള്ളത് മറ്റൊരു വസ്തുതയാണ്. സീലാൻഡിയ എന്നാണ് ഈ ഭൂഖണ്ഡം അറിയപ്പെട്ടിരുന്നത്. നിലവിൽ ഭൂമുഖത്ത് ന്യൂസീലൻഡും ന്യൂ കാലിഡോണിയ എന്ന മറ്റൊരു ദ്വീപും മാത്രമേ ഈ ഭൂഖണ്ഡത്തിന്റേതായി നിലനിൽക്കുന്നുള്ളൂ. ബാക്കിയുള്ള 94 % കരയും സമുദ്രത്തിനടിയിലാണ്. 

ഇപ്പോൾ ഈ ഭൂഖണ്ഡത്തിന്റെ കൃത്യമായ അതിർത്തികൾ കണ്ടെത്താനും സവിശേഷതകൾ നിർണയിക്കാനുമുള്ള ശ്രമത്തിലാണ് ഒരു കൂട്ടം ഗവേഷകർ. ഓസ്‌ട്രേലിയയിലെ ക്വീൻസ്‌ലൻഡ് സർവകലാശാലയിൽ നിന്നുള്ള ഈ ഗവേഷകർ 28 ദിവസം പിന്നിട്ട വമ്പൻ സമുദ്രപര്യവേക്ഷണം ഇതിനായി നടത്തിക്കഴിഞ്ഞു. 37000 ചതുരശ്ര കിലോമീറ്ററോളം ഇവർ ഈ വിധം മാപ്പു ചെയ്തു കഴിഞ്ഞു. ഓസ്‌ട്രേലിയയിലെ പ്രശസ്തയായ ഭൗമശാസ്ത്രജ്ഞ ഡെര്യ ഗുരറിന്റെ നേതൃത്വത്തിലുള്ള സംഘമാണു ഗവേഷണം നടത്തുന്നത്.

ഏകദേശം 50 ലക്ഷം ചതുരശ്ര കിലോമീറ്റർ വിസ്തീർണമുള്ള ഭൂഖണ്ഡമായിരുന്നു സീലാൻഡിയ.യൂറോപ്പിന്റെ പകുതിയോളം വരും ഇതിന്റെ വിസ്തീർണം. 2017ലാണ് ഇതിനു ഭൂഖണ്ഡപദവി ലഭിക്കുന്നത്. തെക്കൻ ശാന്തസമുദ്രത്തിന് 3500 അടിയോളം ആഴത്തിൽ സ്ഥിതി ചെയ്യുന്നതിനാൽ കൃത്യമായി ഇതിന്റെ അതിരുകൾ കണ്ടെത്തുന്നത് ഗവേഷകർക്ക് വലിയ വെല്ലുവിളിയാണ്. 17ാം നൂറ്റാണ്ടിൽ തന്നെ  തന്നെ യൂറോപ്യൻമാർ ഇങ്ങനെയൊരു ഭൂഖണ്ഡം ഭൂമിയുടെ തെക്കേയറ്റത്തുണ്ടാകുമെന്ന് കണക്കുകൂട്ടിയിരുന്നു. ഓസ്‌ട്രേലിയ ആ സമയത്തു തന്നെ കണ്ടെത്തപ്പെട്ടിരുന്നെങ്കിലും ഇതല്ലാതെ മറ്റൊരു ഭൂഖണ്ഡം കൂടിയുണ്ടെന്നായിരുന്നു അവരുടെ വിശ്വാസം. ടെറാ ഓസ്‌ട്രേലിസ് എന്നായിരുന്നു അവർ ഈ സാങ്കൽപിക ഭൂഖണ്ഡത്തിനു നൽകിയ പേര്.

1642ൽ ആബെൽ ടാസ്മാൻ എന്ന ഡച്ച് നാവിക പര്യവേക്ഷകൻ ഈ ഭൂഖണ്ഡംതേടി യാത്ര തുടങ്ങി. ഇന്തൊനീഷ്യയിലെ ജക്കാർത്തയിൽ നിന്നു തുടങ്ങിയ കടൽയാത്രയ്ക്ക് അവസാനം ന്യൂസീലൻഡിന്റെ സൗത്ത് ഐലൻഡിൽ ടാസ്മാൻ എത്തിച്ചേർന്നു. അന്നവിടെ തദ്ദേശീയ ജനതയായ മവോരി ഗോത്രമാണ് ഉണ്ടായിരുന്നത്. അവർ ടാസ്മാനും സംഘത്തിനും നേർക്ക് വലിയ ആക്രമണം അഴിച്ചുവിട്ടു. തന്റെ കപ്പൽ ഇറങ്ങിയ സ്ഥലത്തിനു കൊലപാതകികളുടെ ഉൾക്കടൽ (മർഡറേഴ്‌സ് ബേ) എന്നു പേരിട്ട ശേഷം ന്യൂസീലൻഡിൽ കാൽ കുത്താതെ ടാസ്മാൻ മടങ്ങി.

1895ൽ സ്‌കോട്ടിഷ് ശാസ്ത്രജ്ഞനായ ജയിംസ് ഹെക്ടർ  ന്യൂസീലൻഡിനെ കുറിച്ച് നിരവധി പഠനങ്ങൾ നടത്തിയ ശേഷം ദ്വീപ് പഴയകാലത്ത് ഒരു വലിയ കരയുടെ ഭാഗമായിരുന്നെന്ന് തന്റെ ഡയറിയിൽ കുറിച്ചു. 1995ൽ ഭൗമശാസ്ത്രജ്ഞനായ ബ്രൂസ് ല്യൂയെൻഡിക്കാണു ന്യൂസീലാൻഡിയ എന്ന എട്ടാംഭൂഖണ്ഡത്തെക്കുറിച്ചുള്ള ആശയം ആദ്യം പുറത്തിറക്കിയത്. ന്യൂസീലൻഡിനും ഓസ്‌ട്രേലിയയ്ക്കും സമീപം നടത്തിയ ഗവേഷണങ്ങളുടെ പശ്ചാത്തലത്തിലായിരുന്നു ഇത്.

ഭൂമിയുടെ ആദ്യദശയിൽ പാൻജിയ എന്ന ഒറ്റ വൻകരയാണുണ്ടായിരുന്നത്. ഇതു പിന്നീട് ലോറേഷ്യ എന്നും ഗോണ്ട്‌വാന എന്നും രണ്ട് ഭൂഖണ്ഡങ്ങളായി മാറി. ഇന്നത്തെ ആഫ്രിക്ക, അന്റാർട്ടിക്ക, തെക്കൻ അമേരിക്ക, ഓസ്‌ട്രേലിയ എന്നിവയും ഇന്ത്യൻ, അറേബ്യൻ ഉപഭൂഖണ്ഡങ്ങളും ഉൾപ്പെട്ടതായിരുന്നു ഗോണ്ട്‌വാന. എന്നാൽ എട്ടരക്കോടി വർഷം മുൻപ് ഗോണ്ട്‌വാനയിൽ നിന്ന് ഓസ്‌ട്രേലിയയും സീലാൻഡിയയും ഉൾപ്പെട്ട കരഭാഗം വേർപെട്ട് തെക്കോട്ടു നീങ്ങി. ഇതിന്റെ തുടർച്ചയായി 5 കോടി വർഷം മുൻപ് സീലാൻഡിയ കടലിലേക്ക് അന്തർഗമിച്ചു എന്നാണു ശാസ്ത്രജ്ഞരുടെ വിശ്വാസം. നിലവിൽ സീലാൻഡിയയെക്കുറിച്ചുള്ള അറിവുകൾ ശുഷ്‌കമാണ്. എന്നാൽ വരും കാലങ്ങളിൽ വിവിധ ഗവേഷണങ്ങളുടെ ഫലമായി, കടൽ ഒളിപ്പിച്ച ഈ രഹസ്യങ്ങൾ പുറത്തുവരുമെന്നു തന്നെയാണു ഗവേഷകരുടെ വിശ്വാസം.

English Summary: Hidden boundaries of lost continent 'Zealandia' revealed in incredible detail