ഖത്തർ അമീർ ഡൽഹിയിൽ; ഇന്ന് ചർച്ച

ന്യൂഡൽഹി ∙ രണ്ടു ദിവസത്തെ ഔദ്യോഗിക സന്ദർശനത്തിനെത്തിയ ഖത്തർ അമീർ ഷെയ്ഖ് തമീം ബിൻ ഹമദ് അൽത്താനിയെ പ്രധാനമന്ത്രി നരേന്ദ്രമോദി വിമാനത്താവളത്തിൽ സ്വീകരിച്ചു. ഔദ്യോഗിക സന്ദർശനത്തിനെത്തുന്ന രാഷ്ട്രത്തലവന്മാരെ പ്രധാനമന്ത്രി നേരിട്ടെത്തി സ്വീകരിക്കുന്നത് അപൂർവമാണ്.

സഹോദരൻ എന്നാണു പ്രധാനമന്ത്രി ഖത്തർ അമീറിനെ വിശേഷിപ്പിച്ചത്. ഇന്നാണു മോദിയുമായി ഉഭയകക്ഷി ചർച്ച. രാഷ്ട്രപതി ദ്രൗപദി മുർമുവുമായും കൂടിക്കാഴ്ച നടത്തും. രാഷ്ട്രപതിഭവനിൽ സ്വീകരണവും ഒരുക്കിയിട്ടുണ്ട്. ഖത്തർ പ്രതിനിധിസംഘവും ഡൽഹിയിലെത്തി. രണ്ടാം തവണയാണ് ഷെയ്ഖ് ഹമദ് അൽത്താനി ഇന്ത്യ സന്ദർശിക്കുന്നത്. 2015 മാർച്ചിലായിരുന്നു ആദ്യം.