കോളജിൽ വിദ്യാർഥിക്ക് സഹപാഠികളുടെ ക്രൂരമർദനം

സഹപാഠികളുടെ ക്രൂരമർദനമേറ്റ വെള്ളറട വാഴിച്ചൽ ഇമ്മാനുവൽ കോളജ് ഒന്നാംവർഷ ബികോം വിദ്യാർഥി എസ്.ആർ.ആഷിദ് (19) മെഡിക്കൽ കോളജ് ആശുപത്രിയിൽ ചികിത്സയിലാണ്. വ്യാഴാഴ്ച കോളജിനുള്ളിലായിരുന്നു ആക്രമണം. ആഷിദിന്റെ തലയിൽ പലതവണ തൊഴിക്കുന്നതുൾപ്പെടെയുള്ള വിഡിയോ ദൃശ്യങ്ങൾ പുറത്തുവന്നിട്ടുണ്ട്. മുൻപ് ഇരുവിഭാഗം വിദ്യാർഥികൾ ഏറ്റുമുട്ടിയപ്പോൾ ആഷിദ് പിടിച്ചുമാറ്റാൻ ശ്രമിച്ചതാണ് ആക്രമണത്തിനു കാരണമെന്നു പറയുന്നു. ആഷിദിന്റെ അച്ഛന്റെ പരാതിയിൽ ആര്യങ്കോട് പൊലീസ് അന്വേഷണം തുടങ്ങി. 6 വിദ്യാർഥികളെ സസ്പെൻഡ് ചെയ്തതായും അന്വേഷണ സമിതി രൂപീകരിച്ചതായും പ്രിൻസിപ്പൽ അറിയിച്ചു.