വോട്ടർമാരെ നേരിൽ കണ്ട് ജനസമ്പർക്കത്തിലൂടെ പുതുവഴി കുറിച്ച് കെസി
Mail This Article
ആലപ്പുഴ∙ പ്രചരണ രംഗത്തെ പതിവു രീതികള്‍ ഉപേക്ഷിച്ച് വോട്ടര്‍മാരെ നേരിൽ കണ്ട് അവരുടെ പ്രശ്നങ്ങളും പരിഭവങ്ങളും അടുത്തറിഞ്ഞുള്ള യുഡിഎഫ് പ്രതിനിധി കെസി വേണുഗോപാലിന്റെ പ്രചരണ തന്ത്രം ശ്രദ്ധേയമാകുന്നു. റോഡ് ഷോകൾക്കും വലിയ പൊതുപരിപാടികൾക്കും പകരം താഴെ തട്ടിലുള്ള വോട്ടർമാരെ നേരിൽ കണ്ട് സംവദിക്കാനാണ് കെ.സി വേണുഗോപാൽ മുൻതൂക്കം നൽകുന്നത്.
സ്ത്രീകൾ, മത്സ്യത്തൊഴിലാളികൾ, കർഷകർ, തൊഴിലാളികൾ തുടങ്ങി ജീവിതത്തിന്‍റെ വിവിധ മേഖലകളിൽ നിന്നുള്ള വോട്ടർമാർക്ക് സംഗമിക്കാൻ ഒരു വേദി ഒരുക്കി കെ സി വേണുഗോപാൽ നടത്തിയ സംഭാഷണ പരിപാടി ശ്രദ്ധേയമായി. ഓരോ മേഖലയ്ക്കും അവരുടെ പരാതികളും ആവശ്യങ്ങളും പങ്കിടാൻ ഈ വേദി അവസരം ഒരുക്കുന്നു. ജനപങ്കാളിത്തത്തോടെയുള്ള ഈ സംരംഭം മണ്ഡലത്തിലുടനീളം സജീവമാക്കാനാണ് തീരുമാനം
സമഗ്ര തൊഴിലാളി ക്ഷേമ പദ്ധതി
തൊഴിലാളിവർഗം നേരിടുന്ന വെല്ലുവിളികൾ നേരിടാൻ യുഡിഎഫ് മുൻഗണന നൽകുമെന്ന് തൊഴിലാളികളുമായുള്ള സംവാദത്തിൽ വേണുഗോപാൽ ഉറപ്പുനൽകി. വേതന വർധന, സഹകരണ സംരക്ഷണം, 25 ലക്ഷം രൂപയുടെ മെഡിക്കൽ ഇൻഷുറൻസ്, മണ്ഡലത്തിലെ തൊഴിലാളികളുടെ ക്ഷേമം ലക്ഷ്യമിട്ടുള്ള വിദ്യാഭ്യാസ സഹായ നടപടികൾ എന്നിവ അദ്ദേഹം വാഗ്ദാനം ചെയ്തു.
കർഷകരെയും യുവാക്കളെയും ശാക്തീകരിക്കും
സംയോജിത, സമ്മിശ്ര കൃഷി ചെയ്യുന്ന ദമ്പതികളായ വാണി-വിജിത്ത് ദമ്പതികളുടെ വിജയഗാഥയെ വേണുഗോപാൽ അഭിനന്ദിച്ചു. കർഷകർക്ക് ന്യായവില ഉറപ്പാക്കാൻ സ്വാമിനാഥൻ കമ്മീഷൻ റിപ്പോർട്ടും മിനിമം താങ്ങുവില നിയമവും നടപ്പാക്കുമെന്ന് യുവജനങ്ങളുമായും കർഷക സമൂഹവുമായും നടത്തിയ ചർച്ചയിൽ അദ്ദേഹം വാഗ്ദാനം ചെയ്തു.
തൊഴിലാളികളുടെ അവകാശങ്ങൾ സംരക്ഷിക്കുന്നതിനുള്ള വാഗ്ദാനങ്ങൾ
മുഖ്യമന്ത്രിയെ വിമർശിച്ചുള്ള വാട്‌സ്ആപ്പ് പോസ്റ്റിന്‍റെ പേരിൽ ധനിഷ എന്ന വനിതാ ജീവനക്കാരിയെ പിരിച്ചുവിട്ടതിനെ വേണുഗോപാൽ അപലപിച്ചു. പൊതുമേഖലാ സ്ഥാപനങ്ങളിലെ "രാജാവിനോടുള്ള വിശ്വസ്തത" എന്ന സംസ്കാരം സമൂഹത്തിന് ഭീഷണിയാണെന്നും അത് വെല്ലുവിളിക്കപ്പെടേണ്ടതാണെന്നും പറഞ്ഞ വേണുഗോപാൽ ധനിഷക്ക് തന്‍റെ പിന്തുണയും സഹായവും വാഗ്ദാനം ചെയ്തു
സമഗ്ര മത്സ്യത്തൊഴിലാളി ക്ഷേമ പദ്ധതി
മത്സ്യത്തൊഴിലാളികളുമായുള്ള ചർച്ചയിൽ, സബ്‌സിഡിയുള്ള മണ്ണെണ്ണ, കാലാവസ്ഥാ നിരീക്ഷണം, പ്രത്യേക ഇൻഷുറൻസ്, തീരദേശ നിയന്ത്രണ പരിഷ്‌കരണങ്ങൾ, പ്രത്യേക മത്സ്യത്തൊഴിലാളി ബാങ്കുകൾ എന്നിവ ഉൾപ്പെടുന്ന ഇന്ത്യാ മുന്നണിയുടെ പദ്ധതികൾ വേണുഗോപാൽ വിശദീകരിച്ചു. ഇക്കാര്യത്തിൽ ഇടതുമുന്നണിയുടെ നിലപാട് വോട്ടുകച്ചവടമാണെന്ന് അദ്ദേഹം കുറ്റപ്പെടുത്തി.
വിവിധ മേഖലകളിൽ വേണുഗോപാൽ വാഗ്ദാനം ചെയ്ത സമഗ്രമായ ക്ഷേമനടപടികൾ, താഴെത്തട്ടിലുള്ള ജനങ്ങളുമായി ബന്ധപ്പെടാനും ഒരു ബദൽ ശക്തിയായി മാറാനുമുള്ള യുഡിഎഫിന്‍റെ നയം പ്രകടമാക്കുന്നു. അഭിപ്രായ സ്വാതന്ത്ര്യത്തിന് മുൻതൂക്കം നൽകി നടക്കുന്ന സംവാദങ്ങൾ മാറ്റത്തിന്‍റെ കാറ്റിനെ സൂചിപ്പിക്കുന്നതാണെന്നാണ് യുഡിഎഫ് ക്യാമ്പിന്‍റെ വിലയിരുത്തൽ.
