രുചിയിൽ പുലിയാണീ പുളിയൻ ആവോലി മസാല

വായിലേക്കിടുമ്പോൾ നല്ല ക്രിസ്പ് ആയിട്ടുള്ള മീൻ വിഭവങ്ങൾ ഇഷ്‌മുള്ളവർക്ക് പരീക്ഷിക്കാൻ പറ്റിയ ഉഗ്രനൊരു രുചികൂട്ടാണ് പുളിയൻ ആവോലി മസാല. വാളൻ പുളി, റവ തുടങ്ങിയവയൊക്കെ തരുന്ന വേറിട്ട രുചിയും മണവും എല്ലാവർക്കും ഇഷ്ടപ്പെടും. 

ചേരുവകൾ

• വെളുത്തുള്ളി - 6 അല്ലി
• ഇഞ്ചി - ചെറിയ പീസ്
• വാളൻപുളി - ചെറിയ പീസ്
• തേങ്ങ ചിരകിയത് - 2 ടേബിൾസ്പൂൺ
• കടുക് - 1/4 ടീസ്പൂൺ
• ജീരകം - 1/4 ടീസ്പൂൺ
• ചെറിയ സവാള പൊടിയായി അരിഞ്ഞത് - 1
• കറിവേപ്പില
• മഞ്ഞൾപ്പൊടി - 1/4 ടീസ്പൂൺ
• മുളകുപൊടി - 1/2 – 1 ടീസ്പൂൺ
• കുരുമുളക് പൊടി - 1/4 ടീസ്പൂൺ
• ഉപ്പ്
• വെള്ളം
• റവ
• എണ്ണ 

തയാറാക്കുന്ന വിധം

• ആദ്യം ഒരു മിക്സിയുടെ ജാറിലേക്ക് ഇഞ്ചി, വെളുത്തുള്ളി, തേങ്ങ, 1/2 ടേബിൾസ്പൂൺ വെള്ളത്തിൽ കുതിർത്ത പുളി കൂടി ചേർത്ത് നന്നായി അരച്ചെടുക്കണം. 
• വെള്ളം ആവശ്യമെങ്കിൽ ചേർത്ത് കൊടുക്കാം. 
• അതിന് ശേഷം ഒരു ഫ്രൈയിങ് പാനിൽ വച്ച് 2 ടീസ്പൂൺ എണ്ണ ഒഴിച്ച് കടുക്, ജീരകം ചേർത്ത് കൊടുക്കാം. 
• അതിലേക്ക് പൊടിയായി അരിഞ്ഞ സവാള, കറിവേപ്പില കൂടി ചേർത്ത് നന്നായി വഴറ്റണം. സവാള ബ്രൗൺ കളർ ആകുമ്പോൾ തീ കുറച്ച് മഞ്ഞൾപ്പൊടി, മുളകുപൊടി എന്നിവ ചേർത്ത് പച്ച മണം മാറുന്നത് വരെ വഴറ്റണം. 
• അതിന് ശേഷം ഉപ്പും കുരുമുളകുപൊടിയും ചേർത്ത് കൊടുക്കണം. വീണ്ടും നന്നായി ഇളക്കിയ ശേഷം 2 ടേബിൾസ്പൂൺ വെള്ളം ചേർത്ത് കൊടുക്കണം. 
• വെള്ളം വറ്റി എണ്ണ തെളിയുമ്പോൾ തീ ഓഫ്‌ ചെയ്ത് മസാല തണുക്കാൻ വയ്ക്കണം. 
• മസാല തണുത്ത ശേഷം കഴുകി വൃത്തിയാക്കിയ മീനിൽ പുരട്ടണം, എന്നിട്ട് മസാലയുടെ മുകളിൽ അൽപം റവ വിതറി കൊടുക്കണം. 
• എന്നിട്ട് ഒരു 5 മിനിറ്റ് വച്ച ശേഷം എണ്ണയിൽ വറുത്തെടുക്കാം.

English Summary : Avoli Fish Masala, Lunch Special Recipe.