ഇനിയൊരു തീരത്ത് – ശ്രീപദം എഴുതിയ കവിത

ഇനിയൊരു തീരത്ത് കാണാമെന്ന്

പറഞ്ഞു നീ പിരിഞ്ഞനേരം

എൻ കൺകളിലൂറിയ നൊമ്പരമേഘങ്ങൾ 

പെയ്തൊഴിയാതെ ഘനീഭവിച്ചു..
 

കട്ടപിടിച്ചൊരെൻ സ്വപ്നങ്ങളും

മാറാല കെട്ടിയ ചിന്തകളും 

ഒരു നോക്കുകണ്ടാലലിഞ്ഞ്പോം  

മറ്റൊരു ഹിമാദ്രിയായെന്നിൽ വളർന്നു വന്നു...
 

കയ്യെത്തും ദൂരത്തുണ്ടെന്ന് നിനച്ചു ഞാൻ 

കണ്ണെത്താദൂരവും കടന്നുവെന്നോ

ഇനിയില്ല ദൂരം പിന്നിടുവാനായ് 

വിതുമ്പുമെന്നുള്ളം അറിയാഞ്ഞതെന്തെ...
 

വേഷമഴിച്ച് ഞാൻ, കാലമാം യവനിക-

ക്കപ്പുറത്തെത്തുന്ന നേരത്ത് 

വരുമോ, ഒരുപിടി പൂക്കളുമായ്

എന്റെ സ്വപ്നച്ചുടലയിതലങ്കരിക്കാൻ..