ദാരിദ്ര്യം നീങ്ങി‌ ഐശ്വര്യം കൈവരുന്നതിന്...

ശ്രീ ശങ്കരാചാര്യസ്വാമികളാൽ വിരചിതമായ കൃതിയാണ്  ‌സൗന്ദര്യലഹരി . ഇത്‌ ശിഖരിണി എന്ന വൃത്തത്തിൽ രചിച്ചിട്ടുള്ളതാണ്‌.  ശിവഭക്തനായിരുന്ന ശങ്കരാചാര്യ സ്വാമികൾ ദേവീ പ്രഭാവം തിരിച്ചറിഞ്ഞപ്പോൾ ശക്തിസ്വരൂപിണിയായ പാർവതീ ദേവിയുടെ മാഹാത്മ്യത്തിന്റെയും രൂപത്തിന്റെയും വർണ്ണനകളായി രചിച്ച നൂറോളം സംസ്കൃത ശ്ലോകങ്ങളടങ്ങിയ  കൃതിയാണിത് .  

ഇതിലെ ഓരോ ശ്ലോകങ്ങളും ചിട്ടയോടെ ജപിക്കുന്നത് ജീവിത സംസാരത്തിലെ ഓരോ ദുഃഖങ്ങൾ ശമിക്കുന്നതിന് ഉത്തമമാണെന്ന് വിശ്വസിക്കപ്പെടുന്നു . കടുത്ത ദാരിദ്ര്യം ശമിച്ച്‌ ഐശ്വര്യം കൈവരുന്നതിന്  സൗന്ദര്യ ലഹരിയിലെ ഒന്നാമത്തെ ശ്ലോകം സഹായിക്കും . മാസത്തിലെ സൗകര്യപ്രദമായ 18  ദിവസം തിരഞ്ഞെടുത്ത് ഒന്നാമത്തെ ശ്ലോകം നിത്യേന 27 തവണ ജപിച്ചു ശീലിക്കുക . സകലദുരിതങ്ങളും ഒഴിയും .

ഒന്നാമത്തെ ശ്ലോകം:

ശിവശ്ശക്ത്യാ യുക്തോ യദി ഭവതി ശക്തഃ പ്രഭവിതും

ന ചേദേവം ദേവോ ന ഖലു കുശലഃ സ്പന്ദിതുമപി

അതസ്ത്വാമാരാധ്യാം ഹരിഹരവിരിഞ്ചാദിഭിരപി

പ്രണന്തും സ്തോതും വാ കഥമകൃതപുണ്യഃ പ്രഭവതി

വാക്കുകളുടെ അർഥം:

ശിവ: = സർവമംഗള  പ്രദനായ  ശിവൻ

ശക്ത്യാ = മംഗളസ്വരൂപിണി ആയിരിക്കുന്ന മഹാത്രിപുരസുന്ദരിയോട്

യുക്തോ യദി = കൂടിയവൻ എങ്കിൽ

ഭവതി ശക്ത: = സമർഥൻ ആയി ഭവിക്കുന്നു.

പ്രഭവിതും   = പ്രഭുവായി ഇരിക്കുന്നതിന്, അഥവാ  പ്രപഞ്ചസൃഷ്ടിക്ക്  

ന ചേദേവം ദേവ: = ആ പരമശിവൻ ഇങ്ങനെ ശക്തിയോടു കൂടിയിരുന്നില്ല എങ്കിൽ

ന ഖലു കുശല: = സമർഥനായി ഭവിക്കുന്നില്ല, നിശ്ചയം

സ്പന്ദിതും അപി = ഇളകുന്നതിനു പോലും

അത: = ഇതു ഹേതുവായിട്ടു

ആരാധ്യാം = ആരാധിക്കപ്പെടുവാൻ യോഗ്യയായ

ഹരിഹര വിരിഞ്ചാദിഭി : അപി = ഹരി ശിവബ്രഹ്മാദികളാലും

 പ്രണന്തും = ശരീര വാങ്മനസ്സുകളാൽ നമഃ സ്കരിക്കുന്നതിനും

സ്തോതും വാ കഥം = സ്തോസ്ത്രം ചെയ്യുന്നതിനും എങ്ങനെ

അകൃതപുണ്യ: = ജന്മാന്തരത്തിൽ പുണ്യം ചെയ്യാത്തവൻ

പ്രഭവതി = സമർഥനായി ഭവിക്കുന്നു.

സാരം:

അല്ലയോ പരാശക്തിസ്വരൂപിണിയായ മഹാത്രിപുരസുന്ദരീ ! സർവ മംഗള പ്രദനായ പരമശിവൻ ശക്തിരൂപിണിയായ അവിടുത്തോടു കൂടിയവൻ ആയി ഭവിക്കുന്നു എങ്കിൽ പ്രപഞ്ചസൃഷ്ടിക്കു സമർഥനായിത്തീരുന്നു. ആ പരമശിവൻ അപ്രകാരം അവിടുത്തോട്‌ കൂടിയിരുന്നില്ല എങ്കിൽ ഒന്ന് ചലിക്കുന്നതിനു പോലും സമർഥനാകുന്നില്ല.  ബ്രഹ്‌മാവിഷ്ണുരുദ്രാദികളാലും ആരാധിക്കപ്പെടുവാൻ യോഗ്യയായ നിന്തിരുവടിയെ ത്രികരണങ്ങളെകൊണ്ടു നമസ്‌കരിക്കുന്നതിനും സ്തോസ്ത്രം ചെയ്യുന്നതിനും ജന്മാന്തരത്തിൽ പുണ്യം ചെയ്യാത്ത ഒരുവൻ ഒരിക്കലും സമർഥനാവില്ല.

English Summary :  Significanve of Soundarya Lahari Slokam 01