ഭൂതത്താൻകെട്ടിൽ ഷട്ടറുകൾ ഉയർത്തിത്തുടങ്ങി; കനാലുകളിൽ ജലവിതരണവും പെരിയാറിൽ ടൂറിസം ബോട്ട് സർവീസും നിർത്തി

കോതമംഗലം∙ മഴക്കാല മുന്നൊരുക്കത്തിന്റെ ഭാഗമായി പെരിയാർവാലി അധികൃതർ ഭൂതത്താൻകെട്ട് ബാരേജിന്റെ ഷട്ടറുകൾ ഉയർത്തി പെരിയാറിൽ ജലനിരപ്പ് താഴ്ത്തിത്തുടങ്ങി. 15 ഷട്ടറുകളിൽ 4 എണ്ണമാണ് ഇന്നലെ ഉയർത്തിയത്. 2 ഷട്ടർ ഒരു മീറ്ററും 2 ഷട്ടർ 50 സെന്റി മീറ്ററും വീതം തുറന്നു. മഴ ശക്തമാകുന്നതനുസരിച്ചു ഘട്ടംഘട്ടമായി എല്ലാ ഷട്ടറും തുറക്കും. 34.4 മീറ്ററായി ഉയർന്നപ്പോഴാണു ജലനിരപ്പ് ക്രമീകരിക്കൽ തുടങ്ങിയത്. ഇതോടെ കനാലുകളിൽ ജലവിതരണവും പെരിയാറിൽ ടൂറിസം ബോട്ട് സർവീസും നിർത്തി.