കെഎഎസ്: അപേക്ഷ ഏപ്രിൽ 9 വരെ

തിരുവനന്തപുരം ∙ കേരള അഡ്മിനിസ്ട്രേറ്റീവ് സർവീസ് (കെഎഎസ്) വിജ്ഞാപനം പിഎസ്‌സി പ്രസിദ്ധീകരിച്ചു. അംഗീകൃത സർവകലാശാലാ ബിരുദമുള്ളവർക്ക് അപേക്ഷിക്കാം. 3 സ്ട്രീമുകളിലായാണ് വിജ്ഞാപനം. സ്ട്രീം ഒന്നിൽ നേരിട്ടുളള നിയമനമാണ്. സ്ട്രീം 2, 3 എന്നിവയിൽ നിശ്ചിത സർവീസുള്ള സർക്കാർ ജീവനക്കാർക്കുള്ള നിയമനം. ശമ്പള സ്കെയിൽ: 77,200–1,40,500. അപേക്ഷ സ്വീകരിക്കുന്ന അവസാന തീയതി ഏപ്രിൽ 9. പ്രാഥമിക, പരീക്ഷ, മെയിൻ പരീക്ഷ, അഭിമുഖം എന്നിവയുടെ അടിസ്ഥാനത്തിലാണ് തിരഞ്ഞെടുപ്പ്. പ്രിലിമിനറി ഒബ്ജക്ടീവ് പരീക്ഷ ജൂൺ 14ന് നടക്കും. 100 മാർക്ക് വീതമുള്ള 2 പേപ്പറുകളാണ് പ്രിലിമിനറി പരീക്ഷയിൽ ഉൾപ്പെടുത്തുക. വിവരണാത്മക രീതിയിലുള്ള മെയിൻ പരീക്ഷ ഒക്ടോബർ 17, 18 തീയതികളിൽ നടക്കും. 100 മാർക്ക് വീതമുള്ള 3 പേപ്പറുകളാണ് മെയിൻ പരീക്ഷയിൽ ഉള്ളത്. 2026 ജനുവരിയിൽ ഇന്റർവ്യൂ പൂർത്തിയാക്കി ഫെബ്രുവരി 16ന് റാങ്ക് ലിസ്റ്റ് പ്രസിദ്ധീകരിക്കും. സ്ട്രീം ഒന്നിൽ 11ും രണ്ടിലും മൂന്നിലും 10 വീതവും ആകെ 31 ഒഴിവുകളാണ് റിപ്പോർട്ട് ചെയ്തത്.