കോവിഡിന് ശേഷം സംഭവിക്കാൻ പോകുന്നത്...

മൂന്ന് കോവിഡ് കഥകൾ 

1. കോവിഡ് കഴിഞ്ഞാലും... 

ഒരു ഡോക്ടറുടെ ക്ലിനിക് 

ഡോക്ടർ : എത്ര പേഷ്യന്റ് ഉണ്ട്? 

സിസ്റ്റർ : രണ്ടു പേർ 

ഡോക്ടർ : മാസ്ക് വെച്ച് വരുന്നവരെയെല്ലാം സോപ്പിട്ടു കൈ കഴുകിച്ചല്ലേ കടത്തി വിടുന്നുള്ളൂ. 

സിസ്റ്റർ : അതെ സർ 

ഡോക്ടർ : കോവിഡ് വന്നശേഷം പേഷ്യൻസ് നന്നായി കുറഞ്ഞു അല്ലെ? 

സിസ്റ്റർ : പകുതിയിൽ ഏറെ കുറഞ്ഞു സർ. 

ഡോക്ടർ : ഈ കോവിഡ് കഴിഞ്ഞാലും മാസ്കും സോപ്പ് വെള്ളവും ശീലമാക്കിയാൽ അസുഖങ്ങൾ വളരെ കുറയും. ആരോഗ്യം മെച്ചപ്പെടും. പിന്നെ കുറെ പേര് ഒരസുഖവും ഇല്ലാതെയും വന്നിരുന്നു. അതാണിപ്പോ മനസ്സിലായ ഒരു കാര്യം. 

സിസ്റ്റർ : സത്യം സർ. 

2. കൂട്ട് 

പറമ്പിൽ ഇറങ്ങാൻ തയാറായി കൈക്കോട്ട് തോളിൽ വെച്ചു നിൽക്കുന്ന അച്ഛൻ : ഇനി മുതൽ പറമ്പിൽ എന്തെങ്കിലും പണിയെടുത്തു ജീവിക്കാം.

മകൾ : അച്ഛാ, ഏങ്ങനെയെങ്കിലും ഒരു വർഷം കൂടി മാനേജർ ജോലിയിൽ പിടിച്ചുനിൽക്കണം.

അച്ഛൻ : അതെന്തിനാ ഒരു വർഷം? 

മകൾ : ഈ കൊല്ലം ഞാൻ പത്തിൽ അല്ലെ. സർട്ടിഫിക്കറ്റിൽ അച്ഛന്റെ ജോലി എന്നിടത്ത് കൂലിപ്പണി എന്ന് എഴുതേണ്ടി വരില്ലേ. കൂട്ടുകാരികൾ അറിഞ്ഞാൽ മോശമല്ലേ. 

ആലോചിച്ചു നിൽക്കുന്ന അച്ഛൻ. 

അച്ഛൻ : അതോർത്ത് മോള് വിഷമിക്കണ്ട. കുറെ കൂട്ടുകാരികളുടെ അച്ഛന്മാര് ഇതുപോലെ കൂലിപ്പണിക്കാര് ആയിട്ടുണ്ടാവും ഇപ്പൊ.. 

മകൾ : എങ്കിൽ കുഴപ്പമില്ല. കമ്പനിക്ക് ആളുണ്ടായാ മതി. 

അച്ഛൻ : കൂട്ട് കൂടാതെ സാമൂഹിക അകലം പാലിക്കാൻ പറഞ്ഞാലും കോവിഡ് ഇങ്ങനെ കുറെ കൂട്ടുകാരെ ഉണ്ടാക്കി തരും. 

മകൾ : ഈ നൂറ്റാണ്ടിലെ സാമൂഹിക പരിഷ്‌ക്കർത്താവ് ആരെന്ന ചോദ്യത്തിന്  ഉത്തരം കോവിഡ്. 

3. കണ്ണുകൾ

മാസ്ക് വന്നതോടെ ചുണ്ടുകൾക്ക് പണി കുറഞ്ഞു. ചിരിക്കേണ്ട,  അധികം സംസാരിക്കേണ്ട...

ചിലപ്പോഴൊക്കെ  ചിരിയും സംസാരവും ഏറ്റെടുക്കേണ്ടി വരുന്ന കണ്ണുകൾക്കോ പണി കൂടി...