തെയ്യം – സജിത്ത് കുമാർ എൻ. എഴുതിയ കവിത

തെയ്യോം തെയ്യോം തെയ്യോം

ചെഞ്ചോരചോപ്പുള്ള അരയുടുപ്പും

പച്ചക്കുരുത്തോല വാർമുടിയും

മിന്നും മുനയുള്ള വാളുമേന്തി

തെയ്യം വരവായ് തെയ്യം

തോറ്റംതുടങ്ങി വരവിളിയും

ചെണ്ട തിമില ചിരിച്ചുണർന്നു

കാവിലുറഞ്ഞാടി തെയ്യം

തെയ്യോം തെയ്യോം തെയ്യോം
 

ഒച്ചവെളിച്ചത്തിലാടും തെയ്യത്തിൻ 

ഒച്ചയടഞ്ഞ കാതിലിരുമ്പിയുലഞ്ഞു

നിലാവു മേൽപ്പുര മേഞ്ഞ കൂരയിൽ

മനമുറങ്ങാത്ത അമ്മനെഞ്ചിൻ തേങ്ങൊലി

വിശപ്പുണ്ടുറങ്ങും ഉണ്ണികൾതന്നുടെ 

കത്തിപുകയും വയറിന്റെ രോദനവും

ഒരു നുള്ള്  പുഞ്ചരിയേകാനവർക്ക്

ദൈവം കനിയണം തെയ്യക്കോളായ്
 

ഒറ്റക്കോലമാടി മേലേരി പുൽകുമ്പോൾ

കെട്ടുംകൈയേകും അച്ഛനെയോർത്തതും

ഒറ്റചിലമ്പിട്ടക്കാലുകൾ ആഞ്ഞുതുള്ളി 

വാനവും വായുവും കീറിയലറി

കാവിൽ നിറഞ്ഞാടി തെയ്യം

തീ തുള്ളിയാടും തീപ്പന്തചോട്ടിൽ

പ്രാണന്റെ പാതിയായ് നിന്നവൾ തന്നുടെ

ചേലേഴും കണ്ണിലെ ചെമ്മാനം കണ്ടു
 

പുലരാൻ മടിക്കുന്ന മകരരാവിൽ

നോവിന്നഗ്നിയിൽ നൊന്തുരുകി 

പൊള്ളും സത്യങ്ങൾ നെറുകയിൽ

രക്തമലരായ് പിറന്നു

തെയ്യം ദൈവമായി മാറി

ഭക്തരിൽ പെയ്തിറങ്ങി
 

മനയോലച്ചോപ്പും അരിച്ചാന്തിനാലും

ചമയം മറച്ച മാനുഷഭാവത്തിൽ

തെയ്യം തേങ്ങിക്കരഞ്ഞു

ചെണ്ടയും തിമിലയും മൗനമായി

ആരോ തന്ന നാണയത്തുട്ടിൽ

ദൈവരൂപത്തെ കണ്ടു തെയ്യം
 

Content Summary: Malayalam Poem ' Theyyam ' written by Sajith Kumar N.