കോലാധാരി – അമിത ചന്ദ്രൻ ഇ. എഴുതിയ കവിത

ഇന്നലെ നീ ചാത്തനായിരുന്നു

ഇന്നിതാ ഭഗവതിയായി

നാളെ ചിലപ്പോൾ പൊന്നു മുത്തപ്പൻ ആയിരിക്കാം

അതും കഴിഞ്ഞ് കാളിയായി കലി കയറി ചുവട് വെക്കും

പിന്നെയും പിന്നെയും കെട്ടി ആടാൻ പല പല വേഷങ്ങൾ
 

മുഖത്തെഴുത്തിലെ വർണ്ണങ്ങളിൽ വിരിയുന്ന 

ഭാവങ്ങൾ പലതാണ്

തുടിയും തോറ്റവും ദൈവത്താരുടെ 

പുറപ്പാട് കുറിക്കുമ്പോൾ

നീ നിന്നെ മറന്ന് ചെണ്ട താളത്തിൽ ആടി തുടങ്ങും
 

നിന്നോളം ഭാരമേറും മുടികൾ വെച്ചാടുമ്പോൾ

കണ്ണ് നിറഞ്ഞേ ഞങ്ങൾ കൈകൂപ്പാറുള്ളൂ

മെയ് മറന്നു നീ കനലാടുന്ന നേരം

എന്തെന്നറിയാതെ കനലിന്റെ ചൂടെന്റെ

ഉള്ളം കാൽ പൊള്ളിച്ചിരുന്നു
 

ദൈവത്തെ മണ്ണിലേക്ക് വരവേൽക്കുന്നോരെ

നിന്നെ ഞങ്ങൾ ദൈവത്തോളം ആരാധിച്ചോട്ടെ

കൈകൂപ്പി നിന്റെ മുന്നിൽ അനുഗ്രഹത്തിനായി 

നിന്നപ്പോഴൊക്കെയും 

ദൈവത്താരെ കെട്ടിയാടിയൊരാ കോലാധാരിക്കായി

വേണ്ടിയായിരുന്നെന്റെ പ്രാർഥന
 

ഇനി വരുന്നൊരു തെയ്യക്കാലത്തിനായി

മണ്ണിൽ അവതരിക്കുന്ന ദൈവത്തിനായി

മെയ്യും മനസ്സും മറന്ന് ആടിതീരുന്ന കോലത്തിനായി 

കാത്തിരിക്കുന്നോരോടൊപ്പം...