ഡിആർഡിഒ മുൻ മേധാവി വി.എസ്.അരുണാചലം ‌അന്തരിച്ചു

ന്യൂഡൽഹി ∙ പ്രതിരോധ ഗവേഷണ, വികസന കേന്ദ്രം (ഡിആർഡിഒ) മുൻ മേധാവിയും മിസൈൽ ശാസ്ത്രജ്ഞനുമായ വി.എസ്.അരുണാചലം (87) അന്തരിച്ചു. ബെംഗളൂരു സ്വദേശിയായ അദ്ദേഹത്തിന്റെ അന്ത്യം യുഎസിലെ കലിഫോർണിയയിലായിരുന്നു.

അഗ്നി, പൃഥ്വി, ആകാശ്, നാഗ്, മിസൈലുകൾ, തേജസ്സ് യുദ്ധവിമാനം എന്നിവ വികസിപ്പിക്കുന്നതിൽ നിർണായക പങ്കുവഹിച്ചു. രാജ്യം പത്മവിഭൂഷൺ നൽകി ആദരിച്ചിട്ടുണ്ട്. 1982–92 കാലത്ത് കേന്ദ്ര പ്രതിരോധ മന്ത്രിയുടെ സാങ്കേതിക ഉപദേഷ്ടാവായിരുന്നു. ആജീവനാന്ത സംഭാവനയ്ക്കുള്ള ഡിആർഡിഒ പുരസ്കാരം 2015ൽ ലഭിച്ചു. 1980ൽ ശാന്തി സ്വരൂപ് ഭട്നാഗർ അവാർഡ് നേടി.

ഭാഭ ആറ്റമിക് റിസർച് സെന്റർ, നാഷനൽ എയ്റോനോട്ടിക്കൽ ലബോറട്ടറി, ഡിഫൻസ് മെറ്റലർജിക്കൽ റിസർച് ലബോറട്ടറി എന്നിവിടങ്ങളിലും പ്രവർത്തിച്ചു. യുകെയിലെ റോയൽ അക്കാദമി ഓഫ് എൻജിനീയറിങ്ങിലെ ആദ്യ ഇന്ത്യൻ ഗവേഷകനായിരുന്നു. പ്രധാനമന്ത്രി നരേന്ദ്ര മോദി അനുശോചിച്ചു.

English Summary: Former DRDO chief VS Arunachalam passed away