അധ്യാപകൻ – സുരേഷ് നൂറനാട് എഴുതിയ കവിത

സ്കൂള്‍ മുറ്റത്തൊരു മരമുണ്ട്.

കടുകട്ടി മരം. കാറ്റുപിടിക്കാത്ത

മഴ പൊഴിക്കാത്ത

വേരും വളവും വേണ്ടാത്ത കടുകട്ടി മരം.

വാർപ്പിട്ട മോന്തായവും

ടാറിട്ട തറയുമുള്ള

സ്കൂളിന് ചേരും

മുറ്റത്തെ ആ കട്ടമരം

തളിരില്ല

പൂക്കില്ല

കായ്ക്കില്ല

ഇലകൊഴിയില്ല

വളരില്ല

കരിയില്ല

ആ മരത്തിന് ഒന്നും വയ്യ.

ഒന്നും വേണ്ട.

ഒരേ നിൽപ്പാണ്.

കുട്ടീ,

നീ കരയേണ്ട......

ആ മരത്തേക്കുറിച്ച് ഓർക്കേണ്ട

അതിനെ എഴുതേണ്ട പറയേണ്ട

വല്ലപ്പോഴുമൊരിക്കൽ

കളിച്ചു ക്ഷീണിക്കുമ്പോൾ

നീയതിന്റെ തണലത്തൊന്നു

വന്നിരുന്നാൽ മതി.

തനിയെ അങ്ങിനെയിരിക്കുമ്പോൾ

എനിക്ക് നിന്നെ കാണാം.

ഹായ്!

കുട്ടീ,

ഞാനീ മരത്തിനുള്ളിലാണിരിക്കുന്നത്!

Content Summary: Adhyapakan, Malayalam poem written by Suresh Nooranad