‘എട മോനെ...’; വിമ്പിൾഡൻ ആഘോഷത്തിൽ ആവേശമായി ഇലുമിനാറ്റി!, വിഡിയോ വൈറൽ
Mail This Article
വിമ്പിൾഡൻ ടെന്നിസ് ടൂർണമെന്റിന്റെ ഭാഗമായി പുറത്തുവന്ന ആഘോഷദൃശ്യങ്ങളുടെ പിന്നണിയിൽ മുഴങ്ങിക്കേട്ട് ‘ഇലുമിനാറ്റി’. സ്പാനിഷ് താരം കാർലോസ് അൽകാരസിന്റെ പ്രകടനദൃശ്യങ്ങൾ കോർത്തിണക്കിയുള്ള വിഡിയോ ആണ് ഇപ്പോൾ സമൂഹമാധ്യമങ്ങളിൽ പ്രചരിക്കുന്നത്. ഇതിന്റെ പശ്ചാത്തലത്തിൽ ‘ഇലുമിനാറ്റി’ ഉപയോഗിച്ചിരിക്കുന്നു.
‘ഇലുമിനാറ്റി’യുടെ അകമ്പടിയോടെ വിമ്പിൾഡൻ ഔദ്യോഗിക ഇൻസ്റ്റഗ്രാം പേജിൽ പങ്കുവച്ച വിഡിയോ ദൃശ്യങ്ങൾ ഇതിനകം ദശലക്ഷക്കണക്കിന് ആളുകളാണ് കണ്ടുകഴിഞ്ഞത്. നിരവധി പേർ പ്രതികരണങ്ങൾ അറിയിച്ചു. ഗാനം ആലപിച്ച റാപ്പർ ഡബ്സിയും വിഡിയോയ്ക്കു താഴെ കമന്റുമായി എത്തി.
ഫഹദ് ഫാസിൽ നായകനായെത്തിയ ആവേശത്തിലെ ഗാനമാണ് ‘ഇലുമിനാറ്റി’. പ്രേക്ഷകരെ ആവേശത്തിന്റെ കൊടുമുടി കയറ്റിയ ഗാനം ഇതിനകം 10 കോടിക്കടുത്ത് പ്രേക്ഷകരെ നേടി. സുഷിൻ ശ്യാമിന്റെ ഈണത്തിൽ പിറന്ന ഗാനത്തിനു വരികൾ കുറിച്ചത് വിനായക് ശശികുമാർ ആണ്.
