സിഎജി റിപ്പോർട്ട്: പരീക്ഷാ ഭവനു മുകളിലെ ഷെഡ്; 2.35 കോടിയുടെ പാഴ‌്‌വേല

തിരുവനന്തപുരം∙ പരീക്ഷാഭവനിലെ ആറുനിലക്കെട്ടിടത്തിനു മുകളിൽ ചട്ടങ്ങൾ പാലിക്കാതെ താൽക്കാലിക നില നിർമിച്ച് 2.35 കോടി രൂപ പാഴാക്കിയതായി സിഎജി റിപ്പോർട്ടിൽ വിമർശനം. 2012ൽ തുടങ്ങി 4 വർഷമെടുത്ത് നിർമിച്ച ഷീറ്റ് മേൽക്കൂരയുടെ ഒരു ഭാഗം 2016ൽ കനത്ത കാറ്റിൽ തകർന്നു. അലുമിനിയം ഫാബ്രിക്കേഷൻ പറന്നു പോയി. ഇപ്പോഴും ഈ നില ഉപയോഗിക്കുന്നില്ലെന്നും ഓഡിറ്റ് പരിശോധനയിൽ കണ്ടെത്തി.

33 വർഷം പഴക്കമുള്ള കെട്ടിടത്തിനു മുകളിൽ ഷെഡ് നിർമിക്കുന്നതു ശരിയല്ലെന്നും ഈ തുക ഉപയോഗിച്ചു പരീക്ഷാ ഭവൻ വളപ്പിൽ പുതിയ കെട്ടിടം നിർമിക്കുകയാണു നല്ലതെന്നും പരീക്ഷാഭവൻ ജോയിന്റ് കമ്മിഷണർ 2011ൽ കുറിപ്പ് നൽകിയിരുന്നു. ഇതു തള്ളിക്കളഞ്ഞാണ് വിദ്യാഭ്യാസ വകുപ്പ് കരാർ നൽകിയത്. ഷെഡ് നിർമിക്കുമ്പോൾ മരാമത്ത് വകുപ്പ് കാറ്റിന്റെ ശക്തി ഉൾപ്പെടെ പരിഗണിച്ചില്ലെന്നും സിഎജി റിപ്പോർട്ടിൽ വിമർശനമുണ്ട്. കൊല്ലത്തെ ശുദ്ധജല വിതരണത്തിനായി അധിക ജലസ്രോതസ്സ് നൽകാൻ ഉദ്ദേശിച്ചുള്ള പദ്ധതിക്കായി ചെലവിട്ട 8.5 കോടി രൂപ ജല അതോറിറ്റിയുടെ തിടുക്കവും പണി നിർത്തിവച്ചതും മൂലം പാഴ്ചെലവായെന്നും സിഎജി റിപ്പോർട്ടിൽ കുറ്റപ്പെടുത്തി.

ഉപ്പുവെള്ളം കയറാതിരിക്കാനുള്ള തടയണ ജലസേചന വകുപ്പ് നിർമിക്കാത്തതും ഇക്കാര്യം ജല അതോറിറ്റി ഉറപ്പാക്കാത്തതും പാരിസ്ഥിതികാഘാത പഠനം നടത്താത്തതും വീഴ്ചയാണ്. ഇവ പൂർത്തിയാക്കാതെ പൈപ്പ് ലൈൻ ഇടാൻ തുടങ്ങിയതാണു പദ്ധതി പാഴാകാൻ കാരണമെന്നും റിപ്പോർട്ടിൽ പറഞ്ഞു.

കല്ലടയാറ്റിലെ കടപ്പുഴയിൽ നിന്നു കൊല്ലം ജലവിതരണ പദ്ധതിക്ക് അധിക ജലസ്രോതസ് നൽകുകയായിരുന്നു ലക്ഷ്യം. ഉപ്പുവെള്ളം കയറാതിരിക്കാൻ കല്ലടയാറിനു കുറുകെ തടയണ കെട്ടി ഫലപ്രാപ്തി ഉറപ്പാക്കിയിട്ടേ പദ്ധതി നടപ്പാക്കാവൂ എന്ന വ്യവസ്ഥയിൽ സർക്കാർ ജല അതോറിറ്റിക്ക് 2014 ഒക്ടോബറിൽ 14.5 കോടി രൂപയുടെ പദ്ധതിക്കു ഭരണാനുമതി നൽകി. പണി പൂർത്തിയാക്കേണ്ടത് 2016 ജനുവരി 24ന് ആയിരുന്നു.രണ്ടു തവണയായി 2016 ഡിസംബർ വരെ കരാറുകാരനു സമയം നീട്ടി നൽകി. എന്നാൽ, 1559.05 മീറ്റർ പൈപ്പ് മാത്രം സ്ഥാപിച്ചതോടെ പണി നിർത്തിവച്ചു.

English summary: CAG report on Kerala Pareeksha Bhavan