ചിന്നക്കനാൽ 301 കോളനിയിൽ കാട്ടാന വീട് തകർത്തു

രാജകുമാരി∙ ചിന്നക്കനാൽ 301 കോളനിയിൽ കാട്ടാന വീട് തകർത്തു. പ്ലോട്ട് നമ്പർ 107ലെ ഗന്ധകന്റെ വീടാണ് തിങ്കളാഴ്ച രാത്രി കാട്ടാന തകർത്തത്. കൃഷിയിടത്തിലെ പച്ചക്കറികൾ തിന്നതിനു ശേഷമാണ് കാട്ടാന വീടിന്റെ പിൻഭാഗം തകർത്ത് അകത്തുണ്ടായിരുന്ന അരിയും ഭക്ഷ്യവസ്തുക്കളും പുറത്തെടുത്ത് തിന്നത്. ഗന്ധകനും ഭാര്യയും അടിമാലി താലൂക്ക് ആശുപത്രിയിൽ ചികിത്സയിലായിരുന്നതിനാൽ  വീട്ടിലുണ്ടായിരുന്നില്ല.

അതിനാൽ വൻ അപകടമാണ് ഒഴിവായത്. 3 മാസത്തിനിടെ 3 വീടുകളാണ് 301 കോളനിയിൽ കാട്ടാന തകർത്തത്. സാവിത്രി കുമാരൻ, ലക്ഷ്മി നാരായണൻ എന്നിവരുടെ വീടുകളാണ് കാട്ടാന ഇതിന് മുൻപ് തകർത്തത്. ശാന്തൻപാറ പഞ്ചായത്തിലുൾപ്പെടുന്ന പന്നിയാർ, ചിന്നക്കനാൽ പഞ്ചായത്തിലെ ബിഎൽ റാം, 301 കോളനി, മുത്തമ്മ കോളനി എന്നിവിടങ്ങളിലും കാട്ടാന ശല്യം രൂക്ഷമാണ്.