പച്ച തേങ്ങ അരച്ച തനി നാടൻ ചിക്കൻ കറി

പച്ച തേങ്ങ അരച്ചു ചേർത്ത തനി നാടൻ ചിക്കൻ കറി. ചോറ്, ചപ്പാത്തി, അപ്പം, ഇടിയപ്പം, പൂരി, പൊറോട്ട, പുട്ട് ഏതിന്റെ കൂടെയും സൂപ്പർ കോമ്പിനേഷനാണ്. എളുപ്പത്തിൽ തയാറാക്കാം.

ചേരുവകൾ

• ചിക്കൻ - ഒരുകിലോ
• വെളിച്ചെണ്ണ -  4 + 1 ടേബിൾ സ്പൂൺ
• സവാള - 4
• ഇഞ്ചി വെളുത്തുള്ളി ചതച്ചത് - 2 ടേബിൾസ്പൂൺ
• പച്ചമുളക് - 8
• കറിവേപ്പില
• മഞ്ഞൾപ്പൊടി - അര ടീസ്പൂൺ
• കാശ്മീരി മുളകുപൊടി - ഒരു ടേബിൾസ്പൂൺ
• മല്ലിപ്പൊടി - ഒരു ടേബിൾ സ്പൂൺ
• കുരുമുളകുപൊടി - ഒരു ടീസ്പൂൺ
• ഉപ്പ് - ആവശ്യത്തിന്
• തക്കാളി - ഒന്ന് വലുത്
• തേങ്ങ ചിരകിയത് - ഒരു മുറി
• പെരുംജീരകം - ഒരു ടീസ്പൂൺ
• ചുവന്നുള്ളി - നാല് അല്ലി
• കടുക് - ഒരു ടീസ്പൂൺ
• വറ്റൽ മുളക് -3
• ചുവന്നുള്ളി ചെറുതായി അരിഞ്ഞത് - രണ്ട് ടേബിൾസ്പൂൺ

തയാറാക്കുന്ന വിധം

• ചിക്കൻ കഴുകി വൃത്തിയാക്കി ഇടത്തരം വലുപ്പത്തിലുള്ള കഷ്ണങ്ങളാക്കി വയ്ക്കുക.
• തേങ്ങ ചിരകി അതിൽ പെരുംജീരകവും ചുവന്നുള്ളിയും ആവശ്യത്തിന് വെള്ളവും ചേർത്ത് നല്ല മയത്തിൽ അരച്ച് മാറ്റിവയ്ക്കുക.
• ചുവടുകട്ടിയുള്ള ഒരു പാത്രത്തിൽ നാല് ടേബിൾ സ്പൂൺ എണ്ണ ചൂടാക്കി സവാള, ഇഞ്ചി, വെളുത്തുള്ളി എന്നിവ ചതച്ചത്, പച്ചമുളക്, കറിവേപ്പില ഇവ വഴറ്റുക.
• സവാള മൂത്ത് എണ്ണ തെളിഞ്ഞു തുടങ്ങുമ്പോൾ മസാലപ്പൊടികൾ ചേർത്ത് പച്ചമണം മാറുന്നത് വരെ വഴറ്റുക.
• ചിക്കനും നീളത്തിൽ അരിഞ്ഞ തക്കാളിയും ആവശ്യത്തിന് ഉപ്പും ചേർത്ത് നന്നായി യോജിപ്പിക്കുക.
• അടച്ചു വച്ച് ചെറിയ തീയിൽ 15 മുതൽ 20 മിനിറ്റ് വരെ വേവിക്കുക. ഇടയ്ക്കിടയ്ക്ക് ഇളക്കി കൊടുത്തുകൊണ്ടിരിക്കണം. വെള്ളം ചേർക്കേണ്ട ആവശ്യമില്ല ചിക്കനിലെ വെള്ളം കൊണ്ട് തന്നെ നന്നായി വെന്തു കിട്ടും.
• ചിക്കൻ നന്നായി വെന്തുകഴിയുമ്പോൾ തയാറാക്കിയ അരപ്പും ഗ്രേവിക്ക് ആവശ്യത്തിനുള്ള വെള്ളവും ചേർത്ത് യോജിപ്പിക്കുക.
• അരപ്പിന്റെ പച്ചമണം മാറുന്നതിനു വേണ്ടി വീണ്ടും അടച്ചുവച്ച് 8 മിനിറ്റ് കൂടി ചെറിയ തീയിൽ വേവിക്കുക.
• ഒരു ടേബിൾസ്പൂൺ വെളിച്ചെണ്ണ ചൂടാക്കി കടുകും കറിവേപ്പിലയും വറ്റൽ മുളകും ചുവന്നുള്ളി ചെറുതായി അരിഞ്ഞതും താളിച്ച് കറിയിലേക്കൊഴിക്കുക.

English Summary : Chicken in Coconut Gravy Recipe.