അടുത്ത തലമുറ കംപ്യൂട്ടിങ്ങിന് എച്പി ഡ്രാഗണ്‍ഫ്‌ളൈ ഫോളിയോ ജി3
Mail This Article
ലാപ്‌ടോപ് നിര്‍മാതാവായ എച്പിയുടെ പുതിയ ലാപ്‌ടോപ്-ടാബ്‌ലറ്റ് ഹൈബ്രിഡ് ആയ ഡ്രാഗണ്‍ഫ്‌ളൈ ഫോളിയോ ജി3 എന്തുകൊണ്ടും മികച്ചതാണ്. ഇത് വിന്‍ഡോസ് 11ല്‍ പ്രവര്‍ത്തിക്കുന്ന 13.5-ഇഞ്ച് സ്‌ക്രീനുള്ള ഹൈബ്രിഡ് ഉപകരണമാണ്. ഇതിലെ വിജാഗിരി (hinge) ഉപയോഗിച്ച് സ്‌ക്രീന്‍ 360 ഡിഗ്രിയും തിരിക്കാം. കീബോഡിന് അനുസരിച്ച് വിവിധ രീതിയില്‍ സ്‌ക്രീന്‍ ക്രമീകരിക്കുകയും ചെയ്യാം.
∙ പ്രീമിയം കംപ്യൂട്ടര്‍ വേണ്ടവര്‍ക്കാണ് ഇത് ഉചിതം
മികച്ച ഓലെഡ് സ്‌ക്രീനാണ് ഡ്രാഗണ്‍ഫ്‌ളൈ ഫോളിയോ ജി3യ്ക്ക് ഉള്ളത്. സാധാരണ മോഡലുകളെ പോലെയല്ലാതെ ഓലെഡ് ഡിസ്‌പ്ലേയുള്ള വേരിയന്റും ഉണ്ട്. റെസലൂഷനും തൃപ്തികരമാണ് -1,920x1,280. ഡ്രാഗണ്‍ഫ്‌ളൈ ഫോളിയോ ജി3 ഐപിഎസ് പാനലോടു കൂടിയും വാങ്ങാനാകുമെന്ന കാര്യവും മനസില്‍വയ്ക്കണം. പുതിയ ഡിസ്‌പ്ലേ ടെക്‌നോളജി വേണ്ടവര്‍ക്ക് ഓലെഡ് ഡിസ്‌പ്ലേയുള്ള വേരിയന്റും ബാറ്ററി കൂടുതല്‍ നേരം നീണ്ടുനില്‍ക്കണം എന്നുള്ളവര്‍ക്ക് ഐപിഎസ് പാനലുള്ള വേരിയന്റും തിരഞ്ഞെടുക്കാം.
∙ കരുത്ത്
ഇന്റലിന്റെ 12 ാം തലമുറയിലെ കോര്‍ പ്രോസസറുകള്‍ക്കൊപ്പം 32 ജിബി വരെ എല്‍പിഡിഡിആര്‍5 റാം ഉള്ള മോഡലുകള്‍ വാങ്ങാം. സ്റ്റോറേജ് ശേഷിയും ഗംഭീരമാണ്. 2ടിബി എന്‍വിഎംഇ എസ്എസ്ഡി വരെ ഉള്‍ക്കൊള്ളിക്കാം. കൂടാതെ, 8 എംപി ക്യാമറ ( 100 ഡിഗ്രി ഫീല്‍ഡ് ഓഫ് വ്യൂ), വൈ-ഫൈ 6ഇ, ഇരട്ട തണ്ടര്‍ബോള്‍ട്ട് 4 യുഎസ്ബി-സി പോര്‍ട്ട് തുടങ്ങി മികവുറ്റ ഫീച്ചറുകളും ധാരാളമായി നല്‍കിയിരിക്കുന്നു.
മേല്‍ ആവരണമായി ലെതറിന്റെ അനുഭവം തരുന്ന കവറും താഴെ മഗ്നീഷ്യം മെറ്റല്‍ കെയ്‌സുമാണ് ഉള്ളത്. ഏകദേശം 3.09 പൗണ്ടാണ് ഭാരം. ഓലെഡ് പാനലാണെങ്കില്‍ മുഴുവന്‍ ചാര്‍ജുള്ള ഡ്രാഗണ്‍ഫ്‌ളൈ ഫോളിയോ ജി3 മോഡല്‍ 7 മണിക്കൂര്‍ വരെ പ്രവര്‍ത്തിപ്പിക്കാം. ഐപിഎസ് പാനലുള്ള മോഡലിന് 13 മണിക്കൂര്‍ വരെ ബാറ്ററി ലൈഫ് ലഭിക്കും. മികവുറ്റ ഫീച്ചറുകളുമായി എത്തുന്ന ഡ്രാഗണ്‍ഫ്‌ളൈ ഫോളിയോ ജി3ക്ക് വില കൂടുതലാണ്. തുടക്ക വേരിയന്റിന് 2,379 ഡോളറാണ് വിലയിട്ടിരിക്കുന്നത്.
English Summary: HP Dragonfly Folio G3
