നാലു പതിറ്റാണ്ടോളം പിന്നിലേക്കു പോയി; ഓർമകളെ പുനരാവിഷ്കരിച്ച് വിദ്യാലയമുറ്റത്ത് പൂർവവിദ്യാർഥി സംഗമം
![pathanamthitta-Marur-Govt--Higher-Secondary-School-Alumni-Meeting മാരൂർ ഗവ.ഹയർ സെക്കൻഡറി സ്കൂളിലെ പൂർവ വിദ്യാർഥി സംഗമത്തിൽ പങ്കെടുത്ത പൂർവ വിദ്യാർഥികളും മുൻ അധ്യാപകരും ഓർമകൾ പങ്കിട്ടപ്പോൾ.](https://img-mm.manoramaonline.com/content/dam/mm/mo/district-news/pathanamthitta/images/2023/10/30/pathanamthitta-Marur-Govt.-Higher-Secondary-School-Alumni-Meeting.jpg?w=1120&h=583)
Mail This Article
മാരൂർ ∙ ഓർമകളെ പുനരാവിഷ്കരിച്ച് വിദ്യാലയമുറ്റത്ത് പൂർവവിദ്യാർഥികളുടെ സംഗമം. മാരൂർ ഗവ.ഹയർ സെക്കൻഡറി സ്കൂളിലെ 84–85 വർഷത്തെ പത്താംതരം വിദ്യാർഥികളായിരുന്ന സുഹൃത്തുക്കളാണ് അക്ഷരമുറ്റം കൂട്ടായ്മയുടെ കീഴിൽ ഒത്തുകൂടിയത്. ബാല്യകാല സ്മരണകളെ ദൃശ്യങ്ങളുടെയും സംഗീതത്തിന്റെയും പിന്തുണയിൽ പുനരാവിഷ്കരിച്ചാണ് വിദ്യാലയ തിരുമുറ്റത്തെ കൂടിച്ചേരൽ വേറിട്ടതാക്കിയത്.
പൂർവ വിദ്യാർഥിയായ അമ്പിളി റാം ആണ് ബാല്യകാലവും വിദ്യാർഥി ഗുരുശിഷ്യ ബന്ധവും കോർത്തിണക്കി പാട്ടിന്റെ രചന നിർവഹിച്ചത്. പൂർവ വിദ്യാർഥികൾ, മുൻ അധ്യാപകർ, പുതുതലമുറ വിദ്യാർഥികൾ എന്നിവരാണ് സ്കൂൾ ജീവിതം പുനരാവിഷ്കരിച്ച് പൂർണതയിൽ എത്തിച്ചിരിക്കുന്നത്.പൂർവാധ്യാപകർ വീണ്ടും അവരുടെ പൂർവ വിദ്യാർഥികളെ പഠിപ്പിക്കുന്നത് ക്ലാസ് മുറിയിൽ പുനരാവിഷ്കരിച്ചപ്പോൾ വിദ്യാർഥികൾക്ക് മനസ്സിൽ നിന്ന് മായാത്ത അനുഭവവുമായി. ആൽബത്തിന്റെ സമർപ്പണവും പൂർവ വിദ്യാർഥി സംഗമത്തിന്റെ ഉദ്ഘാടനവും മുൻ ഡിജിപി ഡോ.അലക്സാണ്ടർ ജേക്കബ് നിർവഹിച്ചു.