120 വർഷത്തിന്റെ ചരിത്രം; ജലസ്രോതസ്സുകളുടെ കേന്ദ്രമായി തായിഫ്

തായിഫ് ∙ രാജ്യത്തിന്റെ പ്രധാന ജലസ്രോതസ്സുകളിലൊന്നായി തായിഫ് ശ്രദ്ധ നേടുന്നു. നീരുറവകൾ, അണക്കെട്ടുകൾ, പഴയ കിണറുകൾ എന്നിവയുൾപ്പെടെ പുരാതന ജലസംവിധാനങ്ങളുടെ കാര്യത്തിൽ തായിഫ് ഗവർണറേറ്റ് പ്രശസ്തമാണ്. ഏറ്റവും പുതിയ സാങ്കേതിക വിദ്യകൾ ഉപയോഗിച്ച് ഭൂമിയുടെ ആഴങ്ങളിൽ നിന്ന് തായിഫിലെ  പർവതങ്ങളുടെ കൊടുമുടികളിലേക്ക് വെള്ളം എത്തിക്കുന്നത് സരവത് പർവതനിരകളിലൂടെയാണ്. 

120 വർഷത്തിലേറെയായി സവിശേഷമായ ജലസേചനവും ജലവിതരണ സംവിധാനവും കൊണ്ട് തായിഫിന് രാജ്യത്തിന്റെ ചരിത്രത്തിൽ  പ്രത്യേക സ്ഥാനമുണ്ട്.  ജലസുരക്ഷ ഉറപ്പാക്കുന്നതിനുള്ള  മുന്നേറ്റങ്ങളുടെയും സംരംഭങ്ങളുടെയും ഭാഗമായാണിത്.  അന്തരിച്ച അബ്ദുൽ അസീസ് രാജാവിന്റെ ഭരണത്തിന് കീഴിൽ സൗദി അറേബ്യയുടെ ഏകീകരണത്തിന് ശേഷം തായിഫ് വലിയ പുരോഗതി കൈവരിച്ചിട്ടുണ്ട്. ഇന്ന്  രാജ്യത്തിൻ്റെ പ്രധാന ജലസ്രോതസ്സുകളുടെയും തന്ത്രപ്രധാനമായ ജലസംഭരണികളുടെയും കേന്ദ്രമായി തായിഫ്  നിലകൊള്ളുന്നു.സമഗ്രവും സുസ്ഥിരവുമായ ജലസംവിധാനം നിർമ്മിക്കുന്നതിനുള്ള അടിത്തറയായി ഇത് പ്രവർത്തിക്കുന്നു. എക്രിമ അണക്കെട്ടും മറ്റ് ശ്രദ്ധേയമായ നിർമിതികളും പോലെ ഉമയ്യദ് കാലഘട്ടത്തിലെ ഏറ്റവും പഴയ അണക്കെട്ടുകൾക്ക് ആതിഥേയത്വം വഹിക്കുന്നതിൽ തായിഫ് പ്രശസ്തമാണ്.

തായിഫിൽ എഴുപതോളം അണക്കെട്ടുകൾ ഉണ്ട്. അവയിൽ പലതും ലിഖിതങ്ങളും ചരിത്ര അടയാളങ്ങളും മതപരമായ തീയതികളും ഉൾക്കൊള്ളുന്നതാണ്. ഇത് തായിഫിൻ്റെ ആഴത്തിൽ വേരൂന്നിയ ചരിത്രത്തെ പ്രതിഫലിപ്പിക്കുന്നതു കൂടിയാണ്.