ഒഎൻവി സാഹിത്യ പുരസ്കാരം ടി.പത്മനാഭന്; യുവകവി പുരസ്കാരം അരുണിനും അമൃതയ്ക്കും

തിരുവനന്തപുരം∙ ഒഎൻവി കൾചറൽ അക്കാദമിയുടെ ഒഎൻവി സാഹിത്യ പുരസ്കാരം (3 ലക്ഷം രൂപ) കഥാകൃത്ത് ടി.പത്മനാഭന്. കഥാ സാഹിത്യത്തിനു നൽകിയ സമഗ്ര സംഭാവന പരിഗണിച്ചാണു പുരസ്കാരം. രണ്ടു വർ‌ഷത്തെ ഒഎൻവി യുവ കവി പുരസ്കാരങ്ങളും (50,000 രൂപ) പ്രഖ്യാപിച്ചു. 2021ൽ അരുൺ കുമാർ അന്നൂരും (കലിനളൻ) 2022ൽ അമൃത ദിനേശും (അമൃതഗീത) പുരസ്കാരത്തിന് അർഹരായി. 152 കൃതികളിൽ നിന്നാണ് ഇവരുടെ കവിത സമാഹാരങ്ങൾ പുരസ്കാരം നേടിയത്. 

ഒഎൻവി കുറുപ്പിന്റെ ജൻമദിനമായ മേയ് 27ന് തിരുവനന്തപുരത്തു നടക്കുന്ന ചടങ്ങിൽ പുരസ്കാരങ്ങൾ സമ്മാനിക്കുമെന്നു കൾചറൽ അക്കാദമി പ്രസിഡന്റ് അടൂർ ഗോപാലകൃഷ്ണൻ അറിയിച്ചു. 

English Summary: T Padmanabhan Wins ONV Literary Award