യൂറോപ്പിലെ ഏറ്റവും പ്രായംകൂടിയ കന്യാസ്ത്രീ അന്തരിച്ചു; വിടവാങ്ങിയത് സിസ്റ്റർ സെരഫീന

റോം ∙ യൂറോപ്പിലെ ഏറ്റവും പ്രായംകൂടിയ കന്യാസ്ത്രീ എന്ന നിലയിൽ പ്രശസ്തയായ സിസ്റ്റർ സെരഫീന അന്തരിച്ചു. റോമിൽ വിശ്രമജീവിതം നയിച്ചിരുന്ന സിസ്റ്റർ സെരഫീനയ്ക്ക് 111 വയസ്സുണ്ടായിരുന്നു.

ഇറ്റലിയിലെ അബ്രൂസോ റീജനിലുള്ള ലാൻചിയാനോയിൽ 1913 ഏപ്രിൽ 17ന് ജനിച്ച അവരുടെ ജനന നാമം അന്ന​ല മോർജ എന്നായിരുന്നു. 88 വർഷങ്ങൾക്കു മുൻപ്  19-ാം വയസ്സിൽ ‘മിഷനറി സിസ്റ്റേഴ്‌സ് ഓഫ് ദി സേക്രഡ് ഹാർട്ട് ഓഫ് ജീസസ്’ എന്ന സന്യാസ സമൂഹത്തിൽ ചേർന്നു. സന്യാസവ്രതം സ്വീകരിച്ചപ്പോൾ സിസ്റ്റർ സെരഫീന എന്ന പേര് സ്വീകരിച്ചു.

അബ്രൂസോയിൽ, കുട്ടികളുടെ മതബോധന പരിശീലനത്തിന് നേതൃത്വം നൽകിയിരുന്ന സിസ്റ്റർ സെരഫീനയെ 1952 ൽ റോമിലെ ജനറലേറ്റ് ഹൗസിൽ സേവനത്തിനായി അധികൃതർ നിയോഗിച്ചു. രണ്ട് ലോകമഹായുദ്ധങ്ങളെ അതിജീവിച്ച സിസ്റ്റർ സെരഫീനയ്ക്ക് ജീവിതകാലയളവിൽ പത്തിലധികം മാർപ്പാപ്പാമാരെ (കത്തോലിക്കാ സഭയുടെ ആത്മീയ നേതാക്കൾ) കാണുവാൻ കഴിഞ്ഞു  എന്നതും പ്രത്യേകതയാണ്.

ഇവരുടെ ഇരട്ടസഹോദരിയായിരുന്ന മൊഡെസ്റ്റയും സന്യാസജീവിതമാണ് നയിച്ചിരുന്നത്. സിസ്റ്റർ മോഡസ്റ്റ 2011 ൽ  98-ാം വയസ്സിലാണ് മരിച്ചത്.